Rusia ta acerca e frontera di Union Europeo y NATO --- *Un strike di Rusia na Polonia ta guera contra Aliadonan
ORANJESTAD (AAN) —Tension mundial ayera den horanan di atardi a alcansa un punto maximo nobo na momento cu a bira conoci cu Rusia a lansa un atake na un punto na Ukraina cerca di e frontera cu Polonia.
Pa mundo liber esaki a bira e momento cu e guera na Ukraine a alcansa e punto temibel ya cu na momento cu Rusia mester pasa e frontera di Polonia, e ta declara guera na Polonia y asina tambe na Union Europeo di cual Polonia ta miembro.
Na mes momento Rusia lo ta na guera cu NATO ya cu Polonia ta miembro di NATO.
Con importante e posicion di Rusia ayera tabata, por wordo comprende si tene consideracion cu aliadonan di Ukraine, cu ta Union Europeo y NATO a abstene nan mes di participacion directo na Ukraine mes pa asina evita reclamo oficial di Rusia cu nan a declara Rusia guera.
E hecho cu Merca y Union Europeo a nenga di cera e espacio aereo di Ukraine, ta hancra den e hecho cu na e momento Rusia por considera esaki como un motibo pa declara cu Merca, Union Europeo, NATO ta parti directo di e guera na Ukraine.
E situacion mundial ta realmente tenso, na momento cu mundo ta habri un siman nobo den cual Ukraine ta pidi mas medida di parti di Merca.
Nacionnan Uni a faya di stop Rusia den su intento pa sigui dilanti.
Importante pa mundo ayera a bira e posicion di China cu te ainda ta tene su mes na cierto distancia, aunke informacionnan cu a drenta ayera ta indica cu Rusia kier pidi China asistencia militar pa e por continua cu e lucha contra Ukraine.
Mester papia di un situacion mundial peligroso segun informantenan clave di DIARIO debi na e hecho cu Putin a hinca su mes den un situacion cu e no por hala atras mas, manera for di siman pasa DIARIO a bini ta informa.
Rusia a duna prueba cu ni opinion di Nacionnan Uni por stroba pa e tuma e pasonan cu e kier tuma.
Mientrastanto Venezuela y Cuba cu ta keda den e region di Aruba ta sigui sostene e lucha di Rusia, aunke na Cuba por mira con economia ta basha abou tambe a base di e hecho cu mundo liber a cera porta pa avionnan di Rusia.
Un siman nobo ta cuminsa cu e peliger mas grandi pa un confrontacion directo entre Rusia y NATO mientras Rusia ta acerca frontera cu Polonia!
