ORANJESTAD (AAN): Un explosion fuerte a keda registra Diabierna anochi na e Carrera 46 cu Calle 25, na parti zuidoost di Cali, Colombia.
E lugar di explosion aki ta keda apenas 4,0 kilometer panort di e conocido Hospital Universitario Fundacion Valle del Lili unda hopi Arubiano a yega di haya tratamento medico.
E explosion aki a wordo haci riba un Chevrolet Truck di Polis Nacional cu tabata transporta Polisnan Uniforma di Esmad, cu ta un sorto di Polisnan Anti-Motin.
Informacion cu autoridad a duna, cu artefactonan explosivo a wordo tira for di un vehiculo particular cu a pasa banda di nan, y a bay cay riba e truck cu tabata transporta 15 Polis di Esmad, e momento ey door di e bario Villa del Sur.
E explosion a laga e truck parcialmente destrui, y 13 oficial herida. Tanto Ambulans como tambe Cuerpo di Bombero a mobiliza pa e area. E heridonan a wordo transporta pa 3 diferente Hospital, y dos Polis tin herida grave, y e resto tin herida leve. President Ivan Duque a instrui pa Hefe di Polis Nacional bay mesora na Cali pa lidera e investigacion.
Alcalde Jorge Ivan Ospina mesora hunto cu demas instancia a ofrece un recompensa di 70 miyon Pesos pa hende cu por duna tip pa asina Polis por identifica esnan responsable pa e atake aki.
E grupo rebelde ELN a bin dilanti y asumi responsabilidad pa e atentado aki. E asina yama Frente di Guera Urbano Nacional aki a bisa cu ta trata aki di un retaliacion pa e morto di e homber conoci como ‘Fabian’, kende a ser mata door di Polis aña pasa dia 28 di September.
Riba esaki, President Ivan Duque a reacciona y a reitera cu Colombia “no ta doblega ni lo no doblega hamas pa terorismo.”
E ta kere cu loke ELN kier haci ta stroba e proceso electoral di e aña aki, cu apoyo di dictaduranan socialista y comunista. Pero Gobierno hamas lo duna honor na teroristanan.
Hefe di Polis Nacional, General Jorge Luis Vargas a bishita e 13 Polisnan na Hospital. Mientras tanto a mobiliza 300 militar riba cayanan di Cali pa reforza seguridad despues di e atentado di ELN aki.
Despues a Gobierno a anuncia cu lo duna recompensa di 1.000 miyon Pesos pa por detene e homber conoci como ‘El Rolo’ di ELN. Esey ta bin cu tin inteligencia nobo cu a drenta, cu ta mustra cu for di Venezuela mes, ELN ta planeando y ehecutando atentadonan na Colombia contra forza publico.
