ORANJESTAD (AAN): Durante un conferencia di prensa Diahuebs, a wordo anuncia cu Aruba Airport Authority N.V. (AAA), ta cla pa cuminsa cu su proyecto grandi di
reconstruccion: “Gateway 2030”.
E proyecto ta pa yuda cu e limitacionnan den capacidad, mehora e experiencia di pasahero y tambe e sostenibilidad cu Aeropuerto Internacional Reina Beatrix tin actualmente.
E proyecto ta bay wordo ehecuta pa un grupo di Contratista, esta Albo Aruba NV, Bohama Aruba NV, Arubaanse Wegenbouw Maatschappij(AWM), Croon Caribe y CHS Technical Contracting and Trading Company N.V.
Nan ta bay traha hunto bao di e nomber di ABC Project Venture.
Representante di ABC Project Venture Gerco Rijkers a bisa cu como companianan bon estableci na Aruba, e grupo di contratista ta hopi orguyoso y agradecido pa ta parti di e proyecto aki.
“Teamwork entre AAA, nos partnernan y otro stakeholders envolvi a haci posibel pa nos ta unda nos ta para awe”.
Cu e recursonan combina, experticio local y conocemento di e partnernan di e ABC Project Venture, nos lo por ehecuta e proyecto aki. E proyecto aki no solamente lo contribui na e continuacion di nos negoshinan, pero na mes momento lo crea oportunidad pa varios otro “subcontractors” y “suppliers” y tambe lo stimula Aruba su economia. Cu e realizacion di e proyecto aki nos lo alcanza un otro milestone na Aruba” segun Rijkers.
