ORANJESTAD (AAN): Un grupo local tin pensa di tene Diabierna un manifestacion, pasobra nan ta opina cu tur e medidanan cu a introduci pa asina mitiga e brote di Coronavirus na Aruba ta un violacion di derechonan humano.
E grupo cu ta yama nan mes “Movimento Pro Derecho Humano” a escoge e fecha di 10 December 2021 cu ta ‘World Human Rights Day’ pa manifesta. Esey ta loke tanto Aldrick Tromp, Alexander Geerman, y Zulaika Croes-Dirks a trece dilanti.
Segun e grupo, lamentablemente desde e pandemia na Aruba hopi derecho a worde poni un banda bao di e capa di interes general. Nan a bisa cu tanto e Toque de Queda y Lockdown a causa perdida na negoshi/trabao, depresion y perdida di tempo na movimento liber cu nunca mas lo haya back. Y tur esaki mientras te leu cu nan sa, ningun Landsverordening uitzonderingstoestand a worde traha segun Art. V.29 di Constitucion.
A elabora cu casi no tin privacy mas, ora bo tin di pone nomber cu adres y number di telefon riba lista na establecimentonan, y corda con lista di DVG cu dato medico a leak tambe.
Derecho riba igualidad y e derecho riba un trabao tambe a worde kita di tur tata y mama di famia cu no lo tin un entrada e Pasco aki y ni entrante 1 Januari 2022 debi cu nan no ta vacuna contra Covid-19.
E grupo ta manera purba defende esnan cu ta contra vacuna, y ta convenci cu introduccion di QR-Code lo no beneficia turismo y lo conduci na mas kiebro di derechonan humano. Nan lo sali pa 3:30 pm for di area di ex-Juliana School pa marcha rumbo pa oficina di Gobierno pa entrega manifiesto.
