Minister di Salud Mervin Wyatt-Ras:
ORANJESTAD (AAN)-- Minister Mervin Wyatt-Ras, titular di Salud Publico, Asunto Social y Asuntonan di Adulto Mayor, a reitera cu e problemanan di salud mental a bin ta creciendo na Aruba, e ultimo añanan, y despues di Covid-19 a aumenta mas, y nos comunidad ta confrontando esaki mas, mirando cu e ta afectando tambe nos muchanan.
“Awendia problemanan di salud mental ta wordo diagnostica tambe. Antes bo no tabata tin e diagnostico di kico ta cierto problemanan, aworaki nos tin un cantidad grandi tambe, di muchanan cu ta haya testnan, anto mas bo señala mas tambe bo tin cu duna e yudanza y e presion den nos comunidad, tambe ta bira dia pa dia mas grandi. Si bo wak bon e rol cu social media tin den nos comunidad, hopi hoben ta hopi riba social media, nan ta wordo influencia door di kico ta e norma cu nan ta pensa cu mester ta: bo mester ta bunita, atractivo, bo mester tin placa, tur esakinan tin presionnan cu tin riba e hobennan, anto banda di esey nos a pasa den un situacion unda cu nan mayornan tabata tin menos den nan cartera, y nos como gobierno ta purba yuda mayornan, yuda famianan, nos a hisa e bijstand, nos a yuda e grandinan cu un tiki mas reparatie toeslag den pensioen, p’asina nan por tin un tiki mas den nan cartera”, e dignatario a trece dilanti, indicando cu Esaki ta un problematica, mundialmente tambe, cu mester atende. “Nos tin falta di capacidad tambe, nos tin profesionalnan cu lo por wordo atrae door di e diferente facilidadnan, pero mirando cu den otro pais ta mas atractivo pa nan traha, mirando tambe e suma cu nan por gana financieramente, nan ta scoge pa bay otro caminda”, e mandatario a acentua, agregando cu Aruba tin un reto grandi, y ta purbando di haya e diferente profesionalnan cu mester.
