ORANJESTAD (AAN) – Prome Minister mr. Evelyn Wever-Croes, a declara pa nos comunidad, cu el a tuma nota cu e sindicatonan a anuncia cu e siman aki, ta bay intensiva accionnan y pa oranan mas largo.
E mandatario a reitera, den nomber di gobierno di Aruba, cu nan tin comprension pa e posicion di e sindicatonan y nan lucha, y gobierno ta para di mesun banda cu e sindicatonan.
El a expresa cu ohala gobierno tabata tin e fondonan, e placa, pa por a paga tur empleado publico y semi-publico e 12.6% bek, inmediatamente.
“No ta cu nos no kier pag'e, ta cu nos no por pag'e”, Prome Minister a remarca. “Mescos cu gobierno ta demostra sindicatonan respet pa nan accion, mi ta spera cu nan por demostra e respet ey na gobierno”, Premier Wever-Croes a señala.
Minister Presidente a bisa cu tanten cu e servicionan mas vital pa e comunidad no wordo afecta, gobierno a permiti e sindicatonan pa tene accion y pa demostra nan mal contento. El a agrega cu gobierno ta spera cu e siman aki, e accion por ta civico tambe teniendo cuenta cu no ta perhudica otronan demasiado, por ehemplo nos muchanan cu ta bay scol, of otro hendenan cu mester di servicio.
“Mi ta ripiti, gobierno di Aruba ta compronde y ta para na banda di e sindicatonan y ohala nos tabata den posicion pa paga e 12.6% bek”, e mandatario a reitera.
El a agrega cu mirando cu esey no ta e caso, pasobra gobierno no tin placa, y cu Aruba ta den recuperacion pero su entrada no ta na cien porciento ainda, nan ta pidi e sindicatonan un biaha mas pa dialoga.
El a señala cu un accion sin dialogo no ta bay duna resultado pa ningun parti, cu ta satisfactorio, especialmente no, pa e trahador. “Na e momentonan aki, e proposicion cu nos a haci e sindicatonan ya dos siman pasa caba, ta sigui riba mesa. Ban dialoga, ban papia tocante e situacion financiero, sindicatonan ta haya tur informacion pa nos yega na un punto di salida conhunto, pa nos bay Hulanda y negocia cune. Mi ta lamenta cu no tur sindicato ta acepta e proposicion aki; tin algun sindicato cu si a menciona cu nan ta dispuesto, y nos lo tin cu sigui cu e sindicatonan aki” Prome Minister a reitera.
El a bisa cu gobierno no a reuni cu e Comision Financiero ainda, y pesey di akinan, e yamado na tur e sindicatonan den accion ta pa nan apunta nan representantenan pa e Comision aki, pa gana tempo y ta eficiente cu nan tempo, y traha pa realmente logra algo pa e clase trahado di Aruba.
“Ta den accion sin dialogo no ta bay duna ningun resultado, simplemente pasobra gobierno no tin e placa; pues, e invitacion tey ainda. Bin na mesa di dialogo, haya tur e informacion financiero cu sindicatonan ta reclama cu nan no tin ainda, cual mi no ta kere pasobra sindicatonan a haya tur cos, pero si mester di algo, si tin algo pa aclarea, e Comision Financiero ta dispuesto pa haci esey. Nos ta spera cu sindicatonan recapacita, reconsidera, y acepta e oferta di gobierno, un biaha mas, sinta na mesa dialoga, forma un punto di salida conhunto, y asina bay Hulanda pa negocia”, un bez mas e dignatario a remarca.
