Importancia di ruta alternativa cu a conduci na descubrimento America
*Mundo ta regresa na e buskeda di rutanan comercial alternativo
*Aruba parti di e baluarte comercial Hulandes na un punto strategico
ORANJESTAD(AAN)—Cambionan importante ta presentando nan mes rond mundo, cu ta busca alternativanan riba tereno di comunicacion y comercio internacional.
Diferente factornan ta hunga un papel importante den un mundo carga cu disputanan cu ta afecta rutanan, cu den pasado a uni mundo.
Importante den e situacion mundial actual, ta e problemanan di trafico comercial, cu ta e motibo basico cu mundo semper tabata den buskeda di rutanan alternativa loke a conduci na e expedicionnan cu a termina entre otro cu e descubrimento di continente Americano dor di paisnan Europeo.
Na e momento cu Cristobel Colon a descubri cu mundo tabata rondo, directamente el a sirbi e necesidad di un ruta alternativa pa economia mundial, den buskeda di articulonan cu den su tempo tabata base di comercio.
Te awor e posibilidadnan di Sud America a cuminsa realmente ta ricibi atencion y manera ya na otro ocasionnan DIARIO a trece dilanti, ta habri porta tambe pa facilidadnan pa Aruba.
Manera informantenan clave a trece dilanti na DIARIO, Aruba no por perde mas tempo pero awor pasonan mester wordo tuma pa sigur hunto cu Reino yega na ampliacionnan di e posibilidadnan pa Aruba bira un punto central den comercio mundial entre e continentenan.
A wordo splica na DIARIO cu e punto importante na fabor di Aruba, ta e hecho cu Aruba ta teritorio Hulandes, conoci pa trankilidad interno den Reino.
Informantenan clave ta mustra DIARIO cu Aruba no mester perde mas tempo pa cuminsa na un forma organisa cu Reino, pa amplia e posibilidadnan pa Aruba bira un punto central riba rutanan comercial importante cu ta den formacion a base di e problemanan mundial cu ta presenta y ta stroba conexion sigur maritimo entre continentenan.
Segun informantenan Aruba ta perdiendo tempo valioso den construccion di posibilidadnan sumamente importante cu e situacion actual ta presenta.
Expertonan comercial a indica cu e situacion mundial di e momentonan aki, ta suscribi e motibo di biahenan den pasado di exploracion di teritorionan nobo y asina descubrimento di America.
Aruba ta resalta den su region pa hustamente e problema cu e parti grandi di America Latino a conoce, cu ta falta di un grado halto di educacion, cu Aruba si conoce y a entrega na Aruba un nivel mundial halto di reconocemento pa su posibilidadnan pa haci negoshi.
“Mundo ta pasa awor den un ciclo di reorganisacion,”expertonan ta indica y nan ta mustra cu den esaki, Aruba mester mira con e por brinda posibilidadnan pa diversifica economia cu ta base social di e pais.
