ORANJESTAD (AAN): Na juni 2025 Consulado Colombiano a acerca Señor Carlos Croes, vice-presidente di Fundacion Lanta Papiamento (FLP)
cu e peticion pa organisa un curso basico di Papiamento pa inmigrante di Colombia den cuadro di e proceso di integracion.
E curso aki lo forma parti di e proyecto “Casa de Colombia” cu a planea diferente actividad cultural pa e inmigrantenan Colombiano.
Ta mas cu claro cu Fundacion Lanta Papiamento a acepta e oferta aki y dos di e miembronan cu ta docente certifica di Papiamento, esta Señora Melina van der Linden (Bach.Ed.) y Señor Cesar Kelly (MEd.) a prepara y duna e curso.
E curso a cuminsa dia 1. di september 2025 y a termina dia 8 di december 2025.
Un total di 29 cursista a gradua. Nan tur a laga sa cu nan kier sigui pa un nivel mas halto di dominio di Papiamento.
Segun e docentenan Van der Linden y Kelly e cursistanan tabata masha motiva y a cumpli cabalmente cu e tareanan. Nan a drenta e curso cu casi nada di conocemento di Papiamento y na final nan tabata tribi di papia y hiba un combersacion comprensibel na Papiamento.
Directiva di FLP ta felicita e cursistanan cu nan perseverancia y logro. E chens ta grandi cu FLP ta organisa un di dos curso pa e grupo aki. FLP ta gradici Consulado Colombiano pa e confiansa.
Fundacion Lanta Papiamento ta sigui traha pa logra su meta, aceptacion y bon uzo di Papiamento tur caminda.
