Edwin Jacobs, director SVB:
ORANJESTAD (AAN) – Den un entrevista cu DIARIO, director di SVb, Ir. Edwin Jacobs, a menciona cu desde 2016 SVb a haya autoridad pa duna multa, na momento cu nan constata cu tin violacion di e leynan di Seguro di Malesa y Accidente.
El a splica cu violacion ta: 1) E trahado cu mester wordo asegura y inscribi na SVb for di prome dia di trabao no ta wordo haci, of ta inscribie laat. 2) No duna SVb, informacion corecto.
“E prome ta full den nos sistema mes. Na momento cu un dunador di trabao ta inscribi e trahado awe, y e ta bisa cu el a cuminza traha ayera, e tin un problema pasobra el a inscribie laat. Den nos sistema bo por inscribi un trahado for di un luna prome, y bo ta bisa cu e ta bin traha aki un luna. Inscribi un trahador no lo por ta un problema, ademas, desde 2019 nos tin un web portal. Dus, tur cos ta den man di e dunador di trabao pa registra e trahado”, Jacobs a señala.
El a agrega cu antes tabata tin e caso unda cu e dunador di trabao mester a yena un papel, cual e ta duna e trahado, anto e trahado ta keda cana rond cu ne, pasobra e no ta haya chens di registra. “Pero desde cu nos tin e web portal, no por tin motibo mas pa no ta asegura for di e prome dia cu e ta cuminza traha. Y e trahado mester wordo asegura irespecto su Status Legal na Aruba. Si e ta indocumenta, tambe e mester ta asegura den e seguro di malesa y accidente”, director di SVb a enfatiza. Esaki ta e trahado su derecho y e doño di trabao su obligacion di registra e persona aki.
Jacobs a agrega cu SVb tin un departamento Control Externo, y banda di cu e departamento aki ta investiga, na momento cu tin casonan sospechoso cu ta parce fraude di seguro, tin seis funcionario oficial cu tin autoridad pa controla y duna boet.”Nos ta forma team y ta controla a base di tips cu drenta cu na tal caminda trahadornan no ta asegura. Nos ta recolecta tur esey, ta traha un schedule, y nos agentenan social ta pasa controla e doñonan di trabao, pa wak si realmente e trahadornan ta asegura of no” Edwin Jacobs, director, a señala.
El a agrega cu nan tin nan controlnan structura, ta dos biaha pa luna, un biaha ta den ora di oficina, y e otro biaha ta despues di ora di oficina.
