Ministerio Publico mester dicidi riba un Rapport Refineria Aruba -- Serlimar ta prueba di maltrato politico di un pais manipula -- Rapport Refineria ta splica con hasta prensa por come di politica
ORANJESTAD(AAN)- Ora menciona e nomber di e compania “Serlimar”, pensamento ta bay directamente na sushedad.
E accion di trahadornan di Serlimar e siman aki, a habri pa Aruba no solamente e buki di realidad di Serlimar como empresa di Gobierno, pero tambe e realidad di companianan di Gobierno cu uno tras di otro a splica e realidad di maltrato politico di un pais yama Aruba, cu a bira victima di manipulacion politico.
Nos ta sigui tur paso gubernamental y asina por comprende cu Ministro Ursell Arends lo bay pidi pa prolonga e “surseance van betaling” pa Serlimar cu asina mester evita cu e mester pone un suma cu e no por paga riba mesa, pa no wordo declara bancarota.
Serlimar ta representa e realidad di Aruba, cu na 2014 ya tabata den estado di “surseance van betaling”, un tempo di gracia cu Reino a duna Aruba, pa evita cu Aruba lo a bay bancarota.
Asina mes, mientras supervision a cuminsa deshaci di e Status Aparte di Aruba, porta a habri pa e manipulacion total di Pueblo di Aruba cu a bira victima di maltrato politico di parti di un gobierno cu a destrui Aruba.
Den tur loke ta pasa Aruba awe, ta topa cu un realidad. Abuso a wordo haci di e sistema democratico di Aruba riba cual e Gobierno di Mike Eman a trapa cu dos pia.
Awe mas cu nunca DIARIO ta sigui profundisa di e rapport Refineria di Aruba, cu ta den man di Huez, cu ta duna prueba con ora ya Aruba a wordo sentencia na horca financiero dor di Gobierno Mike Eman, manipulacion cu e refineria di Aruba a destrui loke a resta di e pais.
Mientras Aruba ya tabata den estado di bancarota for di 2014, ora alarma grandi mester a wordo bati, e manipulacion politico di Aruba a culmina manera e Rapport di Refineria di Aruba ta mustra.
Na 2014, como Prome Ministro Mike Eman a duna un show den Fort Zoutman caminda su huelga di hamber mester a sirbi pa crea hamber pa e Pueblo di Aruba, cu no a mira e falsedad di un gobernante cu tabata sa cu Aruba no por a soporta e maneho di abuso cu el a introduci pa e pais.
Cu Aruba tabata den e mes estado cu na e momentonan aki Serlimar ta, ta wordo presenta den tur rapport di instancianan oficial local pero tambe den rapportnan di entre otro International Monetary Fund.
Mike Eman y su Gobierno a trapa riba tur ley di Aruba, a trapa riba Parlamento di Aruba, pa condena Aruba na e contracto cu Citgo, den cual bienestar di Aruba a wordo destrui.
Awe DIARIO ta en espera di e Rapport di Refineria di Aruba cu ta den man di Huez Comisario pa dicidi si ta cuminsa cu persecucion penal a base di loke ta wordo presenta den e rapport.
Den e Rapport di Refineria di Aruba por lesa con hendenan a probecha di entrada di e refineria contra interes di Aruba manera Raad van Advies a spierta for di momento cu na forma ilegal, contra ley, Gobierno Mike Eman a introduci e proyecto.
Creacion di e compania Refineria di Aruba no a duna ningun resultado pa bienestar di Aruba. Pero den e rapport por lesa con hasta compania di miembro di prensa cu ta fiel sosten di Mike Eman, si tabata tin ganashi cu Refineria di Aruba.
Un compania di Pueblo di Aruba a wordo habri den cuadro di Citgo. Un compania cu den man di Eman a bira base pa un rapport cu ta splica con a maltrata Pueblo di Aruba politicamente for di 2014 te na momento cu Hulanda a bisa ta “basta”.
Awe Aruba mescos cu Serlimar mester di un “surseance van betaling” pasobra Aruba ta bancarota, manera Hulanda a mustra ora Hulanda a duna Aruba e placa pa evita cu Aruba mescos cu Serlimar no ta den un posicion pa paga su debe.
DIARIO ta keda en espera di e rapport di Refineria di Aruba, uno di e companianan di Gobierno cu ta prueba di e forma cu intervencion di Reino na 2014, a evita cu Aruba a zink!
