COMENTARIO:
Skirbi pa Mercedes Monge
Cu hopi stimacion y gratitud na mi curazon, mente y spirito, mi ta desea henter pueblo di Aruba un hopi feliz Dia di Himno y Bandera celebrando 50 aña, y 40 Aniversario di Aruba su Status Aparte.
Cu orguyo mi tin cu bisa cu aki na Aruba a nace mi cinco nietonan, y mi dos yiunan ta akinan a lanta for di scol primario y secundario, a studia haci un carera y awendia ta dos profesional cu nan propio desaroyo, nan famia, cu nan soñonan, deseo y proyectonan pa sigui crece y avanza mas como ciudadanonan di e Isla bunita, privilegia y stima aki, cu yama Aruba. Nos Aruba dushi tera.
Danki Aruba, pasobra ta akinan unda mi a desaroya como reportero y te ainda ta sigui cana riba e riel di periodismo, mi carera stima, aki na Aruba. Asina mes, ainda cu un trayectoria di casi 34 aña, di cana na pia of transporta den bus, entre cas y trabao, mi ta sigui ta un hende util den nos comunidad, y mi ta hopi gradici na Dios na prome lugar, y na e famia Mansur y nos famia di DIARIO, pa nan acogida di tanto aña, te cu Dios dicidi otro. Mi deseo sincero cu pueblo di Aruba henter goza di nos Dia Nacional, y cu sigui briya eternamente como nos “Aruba dushi tera, nos baranca tan stima”!
