Sary Wernet-Kelly- Terapista di Revalidacion na FAVI:
*Pero den un mundo di tecnologia pa crea oportunidadnan
ORANJESTAD (AAN)- Sary Wernet-Kelly, Terapista di Revalidacion na Fundacion Arubano pa esnan Visualmente Incapacita (FAVI), a informa den un entrevista cu Matutino DIARIO, cu e Fundacion aki a habri su periodo di Augustus te cu Fin di Aña, cual a cuminza cu hopi actividad na bienestar di su clientenan, incluyendo un exitoso curso di masashi.
Wernet a expresa cu mester wak bek e cosnan positivo cu ya caba a sosode manera e curso di massage cu nan a ricibi, recientemente, cu tabata hopi exitoso. Siete persona cu limitacion visual a participa, di cual seis a logra di gradua. “Nos tabata tin nos lectura y anochi informativo, di Eye Center di ImSan, y Fundacion Diabetico di ImSan; nos tabata tin un sin fin di actividad, principalmente pa clientenan di FAVI durante e siman, manera gym, pero tambe actividadnan cu ta impacta e cliente den forma social, tabata tin charlanan social pa esnan grandi, y nos a papia bek riba e problema di bista”, Sary Wernet a menciona.
El a subraya cu FAVI ta para cla pa e periodo su dilanti, y importante ta cu e fundacion no ta para keto.
“Limitacion di vista no ta defini nos. Kizas aworaki, despues di a mira e video y kizas nos conoce un hende cu tin problema di bista, djis braz’e. Nos ta akinan pa scucha bo, y responde e preguntanan, ban mira un vision pa futuro, pa un bienestar, unda hende cu limitacion di bista ta inclui, nan no ta mas riba un mundo scur, pero un mundo cu tecnologia pa nos crea oportunidad. FAVI ta brinda eyfo”, Sary Werner, Terapista di Revalidacion, finalmente a señala.
