ORANJESTAD (AAN): Pandemia di coronavirus sin duda lo laga atras un sin fin di nomber y nomenclatura.
Na medida cu variantenan nobo ta aparece, manera den caso di Omicron, ya presente den mas di 100 pais na mundo, awo a surgi un cu, ta mustra cu, ta combina Omicron y Delta, cu expertonan a denomina como Deltacron. Autoridadnan di Chipe a informa riba deteccion di hasta 25 caso di infeccion cu un version combina di e variantenan Delta y Omicron di coronavirus SARS-CoV-2.
“Actualmente tin co-infeccionnan di Omicron y Delta. Nos a haya un variante cu ta un combinacion di ambos”, profesor di Biologia di Universidad di Chipre y director di Laboratorio di Biotecnologia y Virologia Molecular, Leondios Kostrikis a splica.
Kostrikis a indica den declaracionnan na canal Signa TV, cu e variante nobo tin e genetica di variante Omicron y genoma di variante Delta.
Den momentonan aki, Kostrikis y su equipo a identifica 25 caso di “Deltacron” y a destaca cu esaki ta mas frecuente den pashent hospitaliza pa COVID-19 cu personanan positivo no hospitaliza.
Dia 7 di januari, nan a manda e muestranan di 25 pashent detecta na e base di dato internacional GISAID di Instituto Pasteur, encarga di publica secuenciacion oficial di variantenan nobo di griep y coronavirus.
“Nos lo wak si den futuro si variante aki ta mas patologico of contagioso of si e lo domina” Delta y Omicron, Kostrikis a indica, aunke den su opinion, ta mas probable cu Omicron lo keda esun mas dominante pa motibo cu e ta mas contagioso.
E detencion di e variante combina a tuma lugar despues cu Organizacion Mundial di Salud (WHO) a adverti cu avance di Omicron por aumenta riesgo cu mas variante y mas peligroso, por aparece.
E variante Omicron ta azotando rond mundo. Merca ta e pais cu mas caso registra, cu mas di 900.000 caso nobo y 2.000 morto pa dia.
Segun datonan mas recien di Universidad Johns Hopkins, diabierna e pais a registra 900.832 caso nobo di covid-19 y 2.615 morto, despues cu dialuna pasa nan a supera pa prome biaha desde inicio di e pandemia, un miyon di caso den un dia.
Brasil a registra e cantidad mas halto di contagio di COVID-19 desde juli. E pais registra 63.292 caso den ultimo 24 ora, y tin un total di 22,4 miyon di caso desde comienso di e pandemia.
