ORANJESTAD (AAN) — Den entrevista cu DIARIO, Eugene Kock , tata di Alysha Kock, un hobencita di 14 aña, a indica cu e ta sigui cu su lucha,
haci su fundraising pa yega na e fondonan pa hiba su yiu Hulanda, pa e wordo yuda y haya un miho tratamento y cuido pa e malesa cu su yiu ta sufri di dje.
“Mi tin cu cera e suma pa mi por transport’e pa Hulanda. Nos ta papiando di un suma di 18 mil florin, pero ora mi a subi mi cuenta online mi a ripara cu falta 3 mil florin pa yega e suma pa nan subi avion”, Eugene a menciona. Esaki lo yega pa e prome tres dianan pa paga un acomodacion, y alimento.
Alysha no por sigui biba na Aruba pa motibo di e clima, y pasobra no tin cuido medico p’e aki na Aruba. Eugene no a acudi na AZV mes, pero e ta basa su mes riba un carta unda di Hulanda nan ta recomend’e kico pa haci.
“Pero AZV a acerca mi diasabra y a duna mi un bon noticia pero diaranzon y diahuebs mi a yama nan y no por a haya contacto. Ban wak si den e dianan aki mi por haya noticia cu nan lo duna mi un man”, Eugene a comenta.
El a splica cu pasobra su yiu tin cu keda biba na Hulanda, nan tin cu cuminza di cero. Nan no tin famia ni conocir aya aworaki, pesey nan mester hunta e placa pa nan mes cana nan camindanan.
E suma di 18 mil florin ora ta traslad'e na Euro, ta masha poco mes, y nan tin cu busca un apartment na Hulanda pa keda biba. Logicamente e mester di ayudo ainda di comunidad.
Pues, personanan cu tin e bon boluntad di duna Eugene Kock y su yiu Alysha un man, por hacie via su number di cuenta pa donacion pa salud di Alysha, cu ta CMB 63121306. Tambe via WhatsApp 745-7691. Y por yama na telefon 744-4162.
{gallery}Eugene Kock mester ayudo di comunidad pa busca salud di su yiu Alysha, na Hulanda{/gallery}
