ORANJESTAD (AAN): Diaranson anochi, e banda tipico crioyo nobo Enkura a sali caya pa un ‘general rehearsal’ den preparacion
pa nan debut oficial den Parada di Lanterna y Parada di Folklore Cultural cu ta tuma luga e fin di siman aki den e bario di Brazil.
Enkura, un nomber cu ta simbolisa Energia, Curason y Cultura, ta consisti di musiconan y cantantenan talentoso ya conoci den nos comunidad entre edad varia di 24 te cu 60 aña pero cu e mesun ritmo y pasion pa nos cultura.
E banda tipico crioyo ta bou guia di director musical Muki Greaux kende hunto cu su ekipo, cu ta consisti di Julisa Hoevertsz y Fabiola Kranwinkel, ta maneha e banda cu determinacion pa carga cultura di Aruba den gran forma. Apesar di reto y contratiemponan, Enkura a logra forma como un banda fresco y autentico, cla pa ofrece Aruba sonido y ritmo tipico crioyo cu bon energia.
Enkura su lema ta: Energia y Curason pa Cultura unda cu esnan di mas edad ta encontra cu esnan mas hoben. Cu bon vibacion, energia limpi, curason grandi, raiz firme y un tribo dinamico.
Enkura ta haci nan debut como banda tipico crioyo e fin di siman aki durante e paradanan den e bario di Brazil y hunto cu Gucci Dancers lo trece ritmo y ambiente riba caya. Y sigur lo pone e publico cant’i caminda goza y baila riba e ritmo crioyo cu lo resona durante henter e ruta di paradanan.
{gallery}Enkura, banda tipico crioyo nobo cla pa subi caya den Parada di Lanterna y Parada di Folklore Cultural{/gallery}
