Skirbi pa: Jossy E. Mansur (Jossito)
Den e momento crucial di nos historia, ora Aruba tabata busca su voz y su identidad, DIARIO a nace como e voz poderoso di un pueblo cu tabata desea palabra propio.
Den un epoca unda nos deseo pa libertad tabata mas fuerte cu nunca, DIARIO a bira e eco di esperanza, e refleho di orguyo, y e canal pa opinion y sentimento di cada Arubiano cu tabata kere den un futuro pa su mes isla.
E no tabata simplemente un corant - e tabata un movimiento, un testamento di fe den Aruba y den poder di palabra liber
DIARIO a nace den un epoca unda pueblo di Aruba tabata pidi mas y mas pa e isla separa di Antiyas Hulandes, y e lucha pa libertad tabata fuerte na final di decada di 1970. E tempo ey casi tur corant bendi na Aruba, tabata bin di Curaçao. Claro cu tin “Seccion di Aruba” den nan, pero ta Redaccion na Willemstad ta dicidi kico ta sali of no. Cu frecuencia e articulonan cu tabata faborece Aruba su posicion den lucha pa independencia tabata laga afo haciendo dificil pa trece e mensaje na pueblo di Arub
Mi mama, Nuhad, tabata un berdadero visionario pa imprimi un corant local, el a sinta cu Jossy y el a convence pa bin cu un corant imprimi na Aruba y asina Jossy a dicidi sin mas pa introduci un berdadero Matutino pa Aruba. Un corant cu ta carga e causa di Aruba, e deseo di pueblo, y bin cu un fuente di noticia cu spectrum amplio di noticia di loke ta pasa na Aruba.
Cu hopi esfuerzo a logra cumpra un mashin pa imprimi corant, a busca Itek Quadritek Photo Typesetter, despues diferente IBM Composer pa traha noticia riba dje, a crea un grupo di periodista y redactornan cu amor pa Aruba, y asina riba Dialuna 3 di November 1980 e prome DIARIO a sali riba caya.
Y su impacto tabata fenomenal. For di e 4 te 8 pagina maximo di “Aruba” cu tabata sali den corantnan di Curaçao, awor pueblo tabata haya 16 pagina completo dedica na Aruba. Tur noticia su socede den tur skina a cuminza haya cobertura, incluyendo deporte, noticia cultural, politico, social, y mas.
E tempo aya, pueblo na Aruba no kier a ni lesa noticianan di Curaçao. Solamente si acaso Gobierno a cay, of tin accident fatal grave na e hermana isla. E cantidad di abonado pa DIARIO a aumenta asina hopi, cu mester a keda busca repartidor cada biaha mas y mas.
DIARIO a bira conoci como e “Matutino Netamente Arubiano”, y tabatin semper un orea pa tur keho di pueblo. Varios instancia tur mainta ta check DIARIO pa tuma nota si tin keho. Tin yen buraco den caminda di Zeewijk? Mesora DOW tabata manda Wegendienst pa drecha. Awa ta lek di tuberia den bario di Angochi? Mesora WEB tabata manda tecniconan pa drecha esey.
Tin hende cu ta haya tas of caha fuerte cu material di balor benta abao y den mondi, y envez di hiba nan pa Warda di Polis, nan tabata trece esaki pa DIARIO. Numeroso biaha DIARIO a ricibi asina hasta tasnan procedente di atraco, cu trahadornan banda di caminda ta haya nan, y ta trece nan pa DIARIO.
Pueblo a cuminza haya e confianza, cu DIARIO ta yuda nan aun mas rapido cu cualkier instancia oficial. Esey ta algo cu na aña 2005 hopi Mericano no por a compronde, di con DIARIO tabata haya mas tips relaciona cu desaparicion di Natalee Holloway. E ta djis mustrabo e confianza cu pueblo tabatin den DIARIO.
A cuminza cu Sorteo DIARIO pasobra pueblo kier mira y ta testigo con sorteo di weganan di number ta tuma lugar bibo.
DIARIO dado momento tabatin e team di Redaccion mas dinamico di Aruba y Antiyas. Django Simoons, Juby Naar, Nilton Lacle, Aureen Werleman, Harry Croes, entre otro. DIARIO a bira un team di hende, cu doñonan cu tabata hende, cu trahadornan cu tabata hende, cu un Pueblo di hende. Editorialnan di Jossy Mansur tabata papia pa nan mes, mientras Arubianonan tabata haci maximo uzo di e arma poderoso cu nan a ricibi pa medio di nan propio matutino.
DIARIO su periodistanan tabata di dia y anochi tur caminda. Y tabata haya informacion rapido, no djis na Aruba sino di exterior. E secuestro di un avion DC-9 di Aeropostal a desvia y ateriza na Aruba, y periodista di DIARIO a hiba e lista di pasahero pa autoridad na Aeropuerto.
Tambe tin caso cu un atraco a caba di socede, y Polis persiguiendo e delincuentenan den auto, y fotografo di DIARIO a haye den accident cu e auto di atracadornan. Di e forma ey e persecusion a finaliza, y e fotografo sin herido a haya su potretnan.
Sin lubida famoso potretnan di DIARIO, e.o. esun unda nos fotografo Django Simoons (q.e.p.d.) a haya OK di Dakota Shopping Paradise a pone un trapi, subi dak, y cu tele-lens a logra saca potret di nos libertador Betico Croes e mainta ey ta “tuma aire” pafo di su cel den Huis van Bewaring Dakota. Betico a mire y hasta hisa man y salud’e, y e potret ey a aparece grandi den DIARIO. Sin lubida e vigilancia tur rond di Playa cu Mariniers di Kazerne cu arma, ora cu Corte di Husticia (e tempo ey temporalmente den edificio di Servicio Postal na Playa) a atende peticion di extradiccion di Merca pa e capo Alvaro Triana di e “Cartel de Medellín” na Colombia, cu a ser aresta na Aruba.
Semper DIARIO tabata encanta publica potretnan grandi pa pueblo por admira un situacion of persona cu tur detaye.
Awe nos ta celebra DIARIO su hacimento di 45 aña trahando cu pueblo y pa pueblo. Pa casualidad mi tin di menciona cu na Februari cu a pasa, nos a celebra tambe exactamente 30 aña desde cu DIARIO a cuminza uza su prome camera digital pa saca potret.
Na tur esnan cu a yuda cu e persistencia pa conmemora 45 aña di DIARIO, ricibi di nos tur un inmenso danki, y keremi cu nos tur ta aprecia e gesto aki cu henter nos curason.
Awe, despues di 45 aña, DIARIO ta sigui firme riba mes fundamento: verdad, confianza y amor pa Aruba.
E papel por cambia, e tecnologia por avanza, pero e compromiso cu pueblo no ta cambia nunca.
Den cada pagina, den cada palabra, ta vibra e mes un espiritu di libertad cu a inspira su nacimento na 1980.
DIARIO ta y keda ta un simbolo di resistencia, union y orgullo nacional.
Cu gratitud profundo, nos ta saluda tur esnan cu a traha, a lesa, a contribuí y a defende e matutino cu su alma Arubiano.
45 aña di DIARIO. Corda cu BERDAD NUNCA A PERHUDICA NINGUN CAUSA, NINGUN HENDE Y NINGUN NACION.
