Pakico ta importante e di tres dosis di e vacuna contra Covid-19
ORANJESTAD (AAN): Tin estudionan cientifico recien cu ta indica cu dos dosis di e vacuna contra Covid-19 ya no ta suficiente pa rechasa un infeccion di e variante nobo omicron.
Sinembargo, e mesun estudionan aki ta conclui cu un di tres dosis (boostershot of dosis di refuerso) si ta suficiente ya cu e ta duna na e sistema inmune e hermentnan pa combati e virus.
Con esaki ta posibel? Esaki ta wordo splica di un manera simpel. E vacunanan ta manera hiba e sistema inmune scol, unda e ta wordo educa pa detecta y combati e virus.
E prome dosis ta scol basico unda ta haya e base fundamental, e di dos dosis ta scol secundario y e di tres dosis ta... universidad of scol avansa.
Esaki kiermen, cu ta keda un sistema inmune altamente getrain cu ta presenta un ambiente increibelmente dificil y hostil pa e virus y su variantenan.
Kiermen, e proteccion cu e di tres dosis ta duna ta mas grandi, mas amplio y cu mas memoria compara cu esun prome.
Ora un persona ta vacuna mas biaha e memoria inmune ta perdura mas, asina a indica na BBC News professor Charles Bangham, virologo y inmunologo di Imperial College London.
"Casi semper bo por contagia bek y loke bo kier ta cu e infeccion aki bira algo trivial caminda bo no lo ripara mes cu bo tin'e ya cu ta algo leve", a bisa.
