ORANJESTAD (AAN) – Durante e vacunathon cu a tuma lugar den e fin di siman cu a pasa, docter Jennifer Wika, encarga pa DVG di e vacunacion na Centro Deportivo Betico Croes,
a splica cu e ta un docter Venezolano y cu ta un placer pe di ta compartiendo cu pueblo di Aruba, e vacunacion aki.
Den entrevista cu DIARIO, Jennifer a expresa cu esaki ta un privilegio pa e muchanan, prome cu tur cos.
El a expresa cu esaki ta otro etapa pasobra ya caba a vacuna adultonan mayor, y tur hende di 18 aña pariba, y 12 pa 17 aña, y awo ta un privilegio pa vacuna esnan di 5 pa 11 aña. El a bisa cu e vacunacion aki ta hopi importante pa preveni, locual na nivel mundial ta un pandemia, y Aruba tin un team hopi capacita, cu ta fusiona e nivel etico y profesional, cu e nivel humano.
El a splica cu e dosis di Pfizer pa mucha di 5 pa 11 aña no ta mescos cu e dosis pa esnan mas grandi of adulto, pero e ta un dosis mas chikito propio den pediatria, y nan ta calcula e peso di e mucha prome cu finaliza e proyecto pa e muchanan. Tur esaki tin un planificacion previo, prome cu ehecuta e vacunacion.
El a bisa cu tur ekipo mester di un capacitacion adicional, kico por ta e reaccion di e mucha, pues no ta algo cu a bin diripiente, pero e ta algo planifica di hopi tempo atras, el a reitera y a haci hopi enfasis cu prome cu a cuminza administra e vacuna na adultonan ya caba tabata tin hopi estudio haci, riba consecuencianan cu por a trece cune. El a agrega cu si e hendenan cu ta contra e vacuna tin e informacion berdaderamente corecto, y conciente, sa cu tin mas di 90% mas di daño pa un ser humano, den un fast food cu den e vacuna aki.
E vacuna aki no tin ningun consecuencia pasobra e ta un ARN mensahero. Mescos cu den nos curpa e ta den e laboratorio di Pfizer y tampoco e ta trece consecuencia na corto, mediano of larto plazo. Solamente e ta eleva e sistema immune y den e caso di e vacunathon aki, di e muchanan.
