Liberacion di gerentenan di Citgo ta exigencia di Merca --- *Departamento di Husticia di Merca en espera di Maduro --- *Regimen Maduro dispuesto pa sinta na mesa cu oposicion
ORANJESTAD(AAN)—Ora Merca a manda un representante pa atende asuntonan cu Nicolas Maduro, un mundo sumamente curioso a sigui e loke por yama e tango di Biden y Maduro y e rumbo cu e lo a hiba e dos paisnan.
Mundo a cuminsa papia di entrega di petroleo Venezolano na Merca, cu realmente ta en busca di paisnan pa reemplasa e petroleo Ruso, cu companianan Mericano tabata uza pa produccion di nan empresanan di articulonan deriva di petroleo.
For di inicio di e crisis mundial, DIARIO a presta gran atencion na comercio internacional, cu no tabata di acuerdo cu e relacion politico entre paisnan.
Kico medidanan economico por nifica pa un pais a bini dilanti, na momento cu Rusia atrobe a conoce sancion di parti di Union Europeo y Merca.
Pa Venezuela medidanan cu a wordo tuma dor di Merca, a paralisa negoshi petrolero Venezolano y e base economico di e pais, cu debenan enorme y un Bolivar sin balor.
E pandemia Covid-19 a kita atencion di e situacion di guera di mundo liber cu Venezuela cu a opta pa tene man di Rusia cu awor ta percura pa mundialmente negoshi di petroleo bira e negoshi grandi di Petro Dollar.
Venezuela a lansa un grito na companianan cu e debe y a pidi pa nan intermedia pa Merca deshaci di e sancionnan cu el a introduci contra Gobierno di Nicolas Maduro.
E hecho cu Merca a manda un representante awor pa papia cu Nicolas Maduro, ta crea impresion cu tur problema a pasa pa pasado
DIARIO a insisti entre otro riba e conflicto grandi cu Citgo ta den e problema entre regimen di Nicolas Maduro y Merca.
Awe e informacionnan di DIARIO ta haya sosten den publicacionnan internacional y informantenan cu ta mustra cu e tango di Biden y Maduro, a hiba Maduro di regreso na loke e ta pa Merca, cu ta un persona cu ta wordo busca dor di Corte di Husticia pa responde pa cargonan pisa hunto cu otro exponentenan di Gobierno Maduro.
Ayera a cera cu e informacion cu Regimen Maduro a bay di acuerdo pa bolbe sinta na mesa cu oposicion di e pais.
Pero esaki no tabata tur exigencia di Merca cu ta para riba su punto cu e gerentenan di Citgo cu Regimen di Nicolas Maduro a tira den prison, mester haya nan libertad.
Esaki ta hiba directamente na e problema serio entre Merca y Venezuela ora autoridad di Merca a cuminsa cu persecucion di dirigentenan Venezolano pa labamento di placa y otro acusacionnan serio.
Husticia Mericano a pidi extradiccion di Alex Saab y a pone un prijs pa entrega na husticia Mericano di e dirigentenan Venezolano, cu ta wordo acusa di crimen.
Venezuela a indica cu e situacion actual tin su sector petrolero tranca. Merca mester di mercadonan nobo pa entrega di petroleo y Venezuela ta un pais cu por entrega petroleo mescos cu mas pais na mundo.
Kico mas Merca a exigi un Nicolas Maduro a cambio di kico?
DIARIO no ta informa Aruba a base di loke tin aparencia di algo. Hecho ta cu e Vice Presidente di Venezuela ayera a splica cu Venezuela ta contra conkista di teritorio.
DIARIO ta en espera di mas informacion cu e lo analisa pa asina Aruba tin informacion corecto na un momento crucial pa Aruba y mundo.
