Señor Ricardo Croes,
ORANJESTAD (AAN): Cu hopi disgusto ex-Parlamentario señor Ricardo Croes, banda di señor Jayburtt Dijkhoff, a papia di su desacuerdonan riba maneho di AZV despues cu a pasa den un experiencia amargo na Bogota Colombia pa tratamento di su yiu.
Entre otro, el a menciona e tardansa di AZV pa tuma decision y pa duna contesta na docternan di Colombia pa un terapia di immune cu AZV no ta cubri na Aruba. Segun e, e tratamento tawata uno necesario y recomenda na Colombia y mes mester a paga pa e tratamento aki.
Croes a duna di conoce cu pashentnan tin diferente derecho. Un di nan ta secrecia pa su malesa. Segun e, e specialist a kibra esaki. E mester ta un acuerdo entre pashent y doctor y un docter no por dicta un banda so kico ta bay haci pero e mester considera kico e pashent ta desea di haci y mester scucha kico e pashent ta haci caba. Den e caso aki, segun Croes, no tawatin net nada di esaki.
E ta expresa cu e no ta di acuerdo cu nan a pasa un cantidad di dia na Bogota sin cu a wordo haci nada pa su yiu pa loke el a bay haci na Colombia. El a menciona tambe cu e no ta di acuerdo cu e placa cu AZV ta duna pa solamente e patient come na e hotel unda AZV ta manda, mientras cu e acompanante mester gasta su mes cen pa come.
Segun e, e cuminda na hotel ta mas tanto junkfood y no ta adecua of saludabel pa su yiu, cu ta den tratamento y hunto cu esaki mester come cuminda saludabel. Por lo tanto, nan mes mester a cumpra cuminda afo di nan mes cen mientras cu AZV ta duna mas o menos $29 pa e patient pa dia.
El a duna di conoce cu en total e tres simannan na Bogota pa tratamento medico di su yiu, a costa nan casi 5 mil dollar di nan mesun saco na cuminda, remedy y tratamento.
Mientras tanto senor Croes y su yiu ta bek na Aruba y ya ta preparando riba gasto propio pa bay bek Colombia pa salud di e yiu, Segun Croes, despues di menasa cu ta bay prensa, el a ricibi email di AZV pa indica nan cu si e hoben mester haci operacion, AZV lo cubri esaki. Pa tene nan informa si esaki lo bay ta e caso. Sinembargo, esaki ta un otro preocupacion di señor Croes, cu ta cuestiona con hopi e proceso aki lo bay tarda pa haya aprobacion y garantia pa e operacion tuma luga.
