Diego de Cuba, presidente di STA:
- Caminda pa Corte no ta prudente aworaki
ORANJESTAD (AAN) Señor Diego de Cuba, Presidente di Sindicato STA, den entrevista cu Matutino DIARIO, a duna di conoce cu ainda e situacion di Thiel Corporation ta fastioso, ora nan no a paga salario y mester a tene accion.
Mediador di Gobierno a cay aden y, ademas, STA a skirbi un carta bastante extenso, y basa riba esaki e sindicato a reuni cu Mediador, tambe.
“Berdad ta cu nos a firma dos protocolo cu e compania, un cu ta regarda e pagonan cu tin cu sosode, e luna aki pa e trahadornan. Un parti di dje a sosode caba, pero e resto tin cu bin ainda dia 23 di December aki.
“Y bo tin e situacion di pensioen na unda e compania a compromete su mes, dos protocol cu e compania cu lo bay provee e pensioen pa e trahadornan, pero te awe nos no a ricibi nada. Nos a pidi nan un copia di e acuerdonan aki, of sikiera un carga unda nan ta splica cu nan a yega na un acuerdo cu e compania en cuestion, y cu esaki ta cierto puntonan cu nan ta bay drecha pa e trahadornan. Pero te awe nos no a ricibi nada ainda. Recientemente, un carta bolbe bay pa Thiel Corporation y Thiel Resources, unda nos ta hala nan atencion.
“Mi a comunik’e door di Mediador di Gobierno, y claro cu nos abogado y tambe nos delegadonan ta na haltura. E trahadornan ta hopi rabia, pa cu e situacion reinante aki, pero nos tin un protocol firma, nos por encamina e caminda di Corte ki momento cu ta, pero nos tin cu ta cauteloso pasobra un di e tareanan primordial di un sindicato ta, pa mantene e cuponan di trabao cu tin”, Diego de Cuba a reitera.
De Cuba a bisa cu mirando e situacion delicado cu tin, e temor cu STA tin ta cu si algo bay fout “tur hende muri”.
“Anto pesey mi ta splica e delegadonan tambe cu nos tin cu trata e situacion aki cu handschoen di felpa, y nos tin cu ta hopi tactico y prudente pa si nan bay Corte, daña nan cara y despues tin cu arepenti”, Diego de Cuba a señala.
