Temporada di horcan a cuminsa den un tempo di problema financiero
*Region di Caribe enfrente e reto grandi di ultimo lunanan di 2022
*Turistanan cu seguro special pa vacacion den temporada di horcan
ORANJESTAD (AAN) — Cualkier momento un problema of calamidad por surgi y afecta hende y nacion.
Den temporada di horcan, ciudadanonan di lugarnan cu ta keda den e zona cu por wordo afecta pa horcan, mester prepara nan mes.
Di e costa di Africa sistemanan di mal tempo ta biaha pa yega region di Caribe y si por, cruza paisnan riba nan caminda pa yega Oceano Pacifico.
Tin horcan cu ta alcansa e costa Norte Americano of despues di ta menasa of baha di Merca, ta sigui pa yega Polo Norte, pero tambe biaha pa Europa cu nan ta alcansa como sistema cu ta causa hopi desaster.
Awe mundo tin e conocemento di Meteorologanan profesional, cu a base di dato por calcula e momento cu un sistema tropical ta bira un menasa un serio pa asina bati alarma pa scapa bida di hende.
E tarea principal di meteorologonan, gobiernonan y tur cu ta envolvi den e proceso di temporada di horcan, ta pa scapa bida di hende.
Na 2022, temporada di horcan ta topa cu un mundo cu tin problema pa come tur dia y pa por tin un vivienda cu ta brinda e seguridad basico contra e fenomeno.
E hende cu awe ya ta den problema financiero, pero mester percura pa e haci gasto pa asina e enfrenta e forsa di naturalesa.
Aruba ta un pais bendiciona cu un nivel di bida cu ta permiti hende prepara su mes y su cas pa enfrenta mal tempo.
Ora lesa e lista di instruccion pa preparacion pa e temporada, por tuma nota cu mester tin un reserva di cuminda y remedi. Mester haci reparacion na casnan. Mester tin material pa proteha vivienda cu mester duna proteccion na hende den situacion extremo.
Paisnan cu tin mas chens pa horcan pasa, den hopi caso ta miho prepara cu paisnan cu chens minimo cu nan lo wordo afecta pa un horcan.
Ya hustamente e paisnan cu no ta costumbra cu e situacionnan extremo di horcan, ta mas na riesgo.
Personanan na paisnan riba rutanan preferi di horcanan, ta traha nan “shelter” riba of hasta bou tera. Shelternan cu nan ta uza tur aña cu ta duna nan e proteccion na momento di pasashi di horcan.
Un shelter den caso di un horcan, no ta un dak cu por bira juguete di biento.
Historia di construccion na Aruba ta mustra con e casnan di antes tabata tin un dak cu tabata hancra den murayanan. Esaki ta nifica cu den pasado, Arubianonan tabata conoci cu preparacionnan pa transforma nan cas den un shelter real.
Pa hopi pais sumamente pober den nos region, pasashi di un horcan ta cruel. Na 2022 ora nan bandona e shelter, hendenan di paisnan caminda horcan ta pasa, mester tin material pa reconstrui nan cas y mester di e reserva di cuminda y awa pa no papia mes di remedi.
Pobresa cu a crece drasticamente na hopi pais, ta un reto grandi den e temporada cu den fin di siman a parce di ta haya su inicio ora un sistema cu por bira un ciclon, a baha di Africa.
Merca ta uno di e paisnan cu ta avisa su ciudadanonan pa biahenan di halto riesgo. Por ehempel e violencianan continuo na Haiti, a haci cu Merca a conseha pa evita Haiti como pais di vacacion.
Mientras autoridad climatologo ta adverti pa un temporada sumamente activo, turistanan ta haci uzo di seguro pa nan por bolbe cas den caso di peliger, pero tambe seguro pa pasaheronan di cruise.
Importante ta cu ta ora e situacion cu ta permiti un sistema nace presenta, e specialistanan di condicionnan di tempo, ta lansa advertencia.
Nan por calcula e cantidad di sistemanan cu lo pasa a base di cifranan di pasado y condicionnan di tempo y temperatura di lama mescos cu presencia di Stof di Sahara.
Ningun hende ta capaz pa bisa cu riba cierto fecha un sistema tropical lo presenta na cualkier lugar na mundo. Esaki ta haci cu paisnan en cuestion mester ta prepara y mester di placa pa prepara.
E situacion social financiero na mundo na e momentonan aki, por ta uno di e contrubuidornan den mas fatalidad, mas destruccion, mas produccion di casonan social cu mester di solucion.
Un daño di 145 Biyon a wordo produci dor di temporada di horcan na 2021. Na 2022, te awor mayoria di paisnan no a conoce un recuperacion sigur cu e situacion di guera y prijs di petroleo.
Despues di algun siman sin actividad di temporada di horcan, e inicio di un sistema a baha fordi costa di Africa.
For di awor pa fin di November, mundo tin un preocupacion mas. Otro situacion mas cu ta exigi placa den un crisis mundial cu ta afecta mundo na tanto manera.
