Director AZV:
ORANJESTAD (AAN) – Siguiendo cu su relato tocante aña 2022, durante un conferencia di prensa Diaranzon di e siman aki, Ir. Edwin Jacobs a señala cu e gastonan total di AZV (Cuido y Administracion) a cera na 479.6 miyon, di cual 462.4 miyon tabata gasto di cuido.
“Si nos compare cu 2019 unda cu e gasto den cuido tabata 444 miyon, ta nifica cu den e tres añanan siguiente e gastonan a aumenta cu 18 miyon, mientras cu e gastonan total di AZV a aumenta cu 17 miyon florin”, Jacobs a señala.
Tabata tin un crecemento di 3.2% y gran parti di esaki tabata inversionnan incidental cu por a haci door di e crecemento di entrada pa atende e asuntonan cu a keda postpone cu a wordo ocasiona pa e pandemia, entre otro listanan di spera na e diferente specialismonan na Aruba.
“E entradanan tabata suficiente. Mas di loke nos a premira. Tabata tin inversionnan cu a keda postpone door di e pandemia, pero nos sa cu tambe a nace, a raiz di e pandemia, listanan di spera na diferente specialismo. Nos a logra e ora ey, duna e sector pa inverti den, entre otro, un software pa laboratorio cu ta bay conecta nan cu e dunadornan di cuido, y aki poco tempo e pashent no ta bay haya formulario mas di docter di cas pa bay laboratorio, pero e docternan di cas y specialista ta manda nan directamente pa e laboratorio. Asina nos ta bay digitalizando mas y mas e network”, Director di AZV a duna di conoce.
Ir. Jacobs a agrega cu AZV a duna pa salud mental un miyon florin adicional. Tin grupo na Respaldo cu tabata hospedando eynan, pero cu en principio no ta pertenece mas na eynan. Nan a wordo saca y manda pa un fundacion y awor nan ta riba nan mes.
“Nos a financia e parti aki pa asina crea capacidad pa atende e lista di spera grandi cu nos tabata tin den cuadro di salud mental. Nos a wak cu e pandemia a bin cu su diferente retonan di salud mental y kizas den e parti di peso, y e ora ey nos a join start e proyecto di prevencion cu e proximo añanan ta wordo carga door di e ministerio pa asina atende cu un asunto cu nos ta kere cu a empeora un poco mas cu ora cu nos tabata tin pandemia”, Ir. Jacobs a indica.
