Conferencia di clima y caida grandi di produccion di pesca na 2050
*E reto di lider Evelyn Wever-Croes cu cambio di clima ta contene
*Di produccion y importacion di cuminda te na cambio den empleo
ORANJESTAD(AAN)—Cambio di clima ta encera cu e hende como parti di naturalesa y comunidad, lo wordo enfrenta cu cambionan grandi cu ta un reto pa lidernan di tur pais na mundo, cu ya biba cu e realidad.
Cu clima a cambia, ta un realidad cu lo bini dilanti, ora ta papia di e forma cu e Arubiano a alimenta su mes den su historia.
Ora hende y su naturalesa ainda tabata biba den paz y union, e poblacion di ayera di Aruba tabata biba na un forma cu e ta conciente cu e hecho cu e ta depende di clima y naturalesa.
Aruba tabata spierta cu salida di solo y drumi ora solo baha. Agricultura, pesca y cria tabata produci cuminda hunto cu minanan cu naturalesa a entrega Aruba.
Inventonan grandi, industrialisacion, a aleha Aruba tambe di naturalesa cu awe ta confronta e pais cu loke ta e reto mas grandi di Gobierrno Evelyn Wever-Croes, cu den tur planificacion mester pone cambionan relaciona cu tempo dilanti.
Despues di e reto pa scapa Florin di Aruba den e crisis financiero y e lucha contra Omicron cu a cera porta di economia, no ta e problema grandi di inflacion causa finalmente pa e Guera di Ukraine, ta e pakete di responsabilidad cu situacion mundial ta entrega na Prome Ministro Evelyn Wever-Croes.
Gobierno Wever-Croes mester acepta e reto di naturalesa cu ta cambia y ta afecta henter e comunidad cu e ta dirigi pa cuminsa cu e cuminda cu Aruba ta produci y ta importa.
Produccion directo di cuminda na Aruba ta parti substancial di e reto di cambio di clima.
Produccion di cuminda na Aruba ta depende di e yobidanan cu tabata spera ora ta prepara cunuconan pa e temporada corto di yobida cu pasashi di horcannan cu ta cuminsa oficialmente den e tempo cu ta celebra fiesta di San Juan.
Yobida cu ya no ta anuncia nan mes manera antes pero cu ora nan presenta, ta bini cu e problema di destruccion cu rond mundo ta wordo registra den forma di mal tempo den e baile cu calor insoportabel.
Cosecha ta na peliger den cambionan y ta exigi mucho mas esfuerzo y conocemento, acopla na tecnologia.
Pesca ta wordo confronta cu un realidad, cu segun ciencia lo nifica cu na 2050 e produccion di pesca lo baha cu 40 porciento.
Ta keda e importacion di cuminda, cu ta parti importante di comercio di Aruba cu lo conoce prijsnan cu mester wordo adapta na e cambionan grandi pa transportacion cu barco y avion cu mester deshaci di azeta como nan combustibel.
Gobernacion na e momentonan aki, ta exigi di Gobierno Evelyn Wever-Croes pa crea un futuro den cual loke ta costumber y normalidad hasta di biento, lo wordo afecta dor di cambio cu ta presenta.
Manera na diferente ocasion DIARIO a trece dilanti, sector di turismo tambe lo conoce reto grandi ya cu aviacion riba distancia largo y uzo di azeta pa barconan ta parti di e discusionnan cientifo serio cu ta wordo hiba ora papia di efecto di cambio di clima.
Con leu nos ta di e momento cu clima lo ataca na forma severo?
Ora papia di cambio di clima, tur hende ta cuminsa pensa den direccion di horcan, cu ta bira un menasa mas serio.
Pero mester cuminsa pensa tambe riba e forma cu lama ta subi tera y e calor cu lo aumenta costo di bida y di haci negoshi cu mas uso di airco of instalacionnan cu ta evita e efecto di calor.
Si mira con e sistema di pasado na Aruba pa confronta calor na forma natural na cas y edificionan publico a wordo cambio, por realisa cu nos ta papia aki di algo serio.
Salud di hende lo wordo afecta cu mas radiacion y lo opone e avance grandi di mundo medico moderno.
Aruba ta prepara pa un conferencia mundial den cual ta atende cu un situacion cu a cuminsa y ta un menasa enorme pa futuro cu mester wordo tene na bista dor di Gobierno Wever-Croes ora papia di gastonan di Pueblo riba tur tereno y planificacion di futuro tambe riba tur tereno.
Tur cos ta indica cu awor Prome Ministro Evelyn Wever-Croes, kende mester a guia Aruba den pandemia y menasa di Guera Mundial, mester dirigi un Gobierno cu e reto mas grandi cu un Gobierno a conoce den historia.
E reto pa un pais enfrenta e cambio di naturalesa, cu ta mishi cu tur aspecto di bida humano!
