Minister Gerlien Croes:
ORANJESTAD (AAN): Minister di Relacionnan den Reino, Educacion, Hubentud, Innovacion y Deporte, mr. Gerlien Croes, elaborando riba un pregunta durante un entrevista cu DIARIO, a expresa cu durante e ultimo lunanan di e Gabinete Wever-Croes a haci un gran cantidad di nombramentonan.
Un di e nombramentonan cu a lanta hopi pregunta y duda den comunidad ta e di señora Sabine de Groot, cu a ser nombra na un puesto importante den e ultimo dianan di e gabinete demisionario. Esaki a trece cuestionamiento for di varios sector di comunidad, cu ta expresa preocupacion tocante e decision di Minister Gerlien Croes. Hopi hende ta puntra pakico ora un gobierno nobo sinta, nan kier kita hende for di trabou of posicionnan cu e gobierno anterior a nombra. Comunidad ta cuestiona tambe e uzo di placa di pueblo pa bay corte, un proceso cu ta costa tanto tempo como recurso financiero di pais Aruba.
Minister Croes a remarca cu e gobierno AVP-Futuro a drenta oficialmente na maart ultimo, y cu efectivamente a tuma nota di e nombramentonan haci na e ultimo momento door di e gobierno saliente – incluyendo nombramentonan cu a tuma luga apenas algun siman prome cu nan a sali for di poder, y apesar cu nan tabata un gobierno demisionario. E minister a considera esaki como un acto iresponsabel.
Minister Croes a confirma cu tin un lista cu ta contene tur e nombramentonan cu a tuma luga den e fase final di e gobierno anterior. E lista aki ainda no a ser publica, pero e minister a enfatisa cu esey lo pasa. Mas importante, el a bisa cu ora cu tin situacionnan cu no ta funciona mas, decisionnan mester ser tuma pa evita cu nos keda traha den e mesun patron. Esaki ta aplica tambe pa e nombramentonan den Enseñanza pa Empleo y den otro departamento gubernamental.
Si tin iregularidadnan cu e nombramentonan haci durante e periodo den cual e Gobierno Wever-Croes tabata demisionario, segun Minister Croes, e investigacionnan lo mustra esaki.
