Minister Dangui Oduber mustra cu Aruba a ricibi 528 mil turista caba!
- A yega y pasa e nivelnan di 2019
ORANJESTAD (AAN) – Minister di Salud y Turismo, señor Dangui Oduber, a duna datonan den conferencia di prensa di Dialuna 1 di Augustus, tocante e desaroyo di turismo na Aruba, durante e prome seis lunanan di 2022.
“Durante e periodo di seis luna Aruba a ricibi 528.325 turista, cu ta un recuperacion di 92% locual sigur, ta algo excepcional”, e dignatario a bisa.
Basa riba grafico e mandatario a mustra cu e aña a cuminza bastante slow, pa motibo cu Aruba tabata den pleno pandemia ainda (Omicron). “Nos tabata tin, naturalmente, otro proyeccion, pero pa motibo di e variante Omicron, nos a recupera solamente 63% di nos turismo den luna di Januari.
Den luna di Februari nos ta wak cu el a crece un poco, el a yega na 84%. Den luna di Maart el a sigui aumenta gradualmente, el a yega 90% caba, y den e lunanan di April, Mei y Juni nos ta mira cu no solamente nos no solamente a yega bek na e nivelnan di 2019 sino cu hasta nos a surpasa e nivel aki, locual ta algo excepcional”, e dignatario a reitera.
Na April, a mira un recuperacion di 108% di e cantidad di bishitantenan, den luna di Mei 103%, y den luna di Juni tambe 103%. Asina e mandatario a comenta.
“Mi ta kere cu ta importante pa bisa cu den Luna di Juli tambe nos ta surpasando e cifranan di Juli 2019”, Oduber a remarca.
E dignatario a detaya e desaroyo di e mercado Mericano cu ta esun principal pa Aruba. Den otro articulo por lesa e cifranan di recuperacion cu Minister Oduber a duna.
