ORANJESTAD (AAN): Diaranson awor, dia 24 di Juli, pa 9:00 p.m., Tele-Aruba lo transmiti e “Documental Ivan Jansen”, conocido concertista y guitarista profesional clasico y di jazz.
April ultimo, un publico grandi a disfruta di e programa aki cu a wordo estrena na Cas di Cultura.
Cu hopi creatividad y profesionalismo, e produccion di Wolff & Co. Studio ta hiba nos riba un viahe emocionante di 360 grado, reflehando Ivan su contribucion significante na e herencia cultural musical di Aruba.
Pa medio di video clips di conciertonan, entrevistanan cu musiconan profesional y academico, cu anecdota, humor y emocion, e programa ta cubri hopi informacion previamente desconoci tocante Ivan su bida profesional y personal, desde e inicio di Ivan su interes den musica te cu awendia.
- E carera musical profesional di Ivan como guitarista clasico (e prome guitarista clasico profesional di Aruba), concertista solista y su participacion den orquesta sinfonico
- guitarista di e genero di jazz; mustrando un abilidad excepcional y poco usual pa domina 2 diferente tecnica y genres, clasico y jazz
- su produccion di 5 CD (2 clasico y 3 jazz)
- su espiritu pionero den incorpora ritmonan di folklore musical di Aruba, den conceptonan harmonico contemporaneo di jazz desde aňanan 1980
- publicacion di buki di musica folklore di Aruba pa guitara clasica cu areglonan di musica folklore di Aruba di piano pa guitara (mayoria hunto cu Alfonso Boekhoudt)
- hopi logronan den enseňanza preparando studiantenan hoben Arubiano pa drenta Conservatorium y practica nan carera musical sea na Aruba of den exterior
- elevacion di e musica folklorico di Aruba den varios forma
- retonan grandi (stroke) cu a descapacite den su profesion y cu ela surpasa cu corahe y determinacion pa bolbe toca bek profesionalmente.
E meta di e Documental ta pa mustra con bo por yuda “crea nacion” pa medio di musica, enseňansa, traspaso di conocimento y desaroyo di caracter;
- pa inspira miembronan di nos comunidad di Aruba, pa comparti nan logro, conocimiento y experiencia den nan area di experticio pa sirbi como inspiracion pa otro
- pa mustra cu determinacion, disciplina, conocimento y pasion, por guia generacionnan hoben alcansa nan metanan y asina inspira nan pa traha duro pa alcansa nan soňonan
- pa demostra cu aunque nos ta un pueblo chikito, nos por logra metanan grandi
E Documental ta inclui entrevistanan entre otro cu varios profesional y academico, manera Maybelline Arends-Croes, Randal Corsen, Todd Dandare, Wilma Kuiperi-Jansen, Serghio Jansen, Jani Croes, Chris Kross, Eddy Samson q.e.p.d., Jamal Baptiste, Ryan Maduro, Richard Holmond, Johnny Croes, Jaderick Croes, Michael Bremo, Kyle Winklaar, Roy Croes, Jeanoir Koolman, Pepper Hymans, Ruud Steenhuisen, terapista Nannelle Croes y jiunan y casa di Ivan, Michella, Ivana, Myrna.
E Documental, ta un produccion di Wolff & Co. y a wordo patrocina door di UNOCA.
E transmision na Tele Aruba ta patrocina pa Ministerio di Finanza y Cultura y Aruba Investment Bank.
