ORANJESTAD (AAN): Recientemente DIARIO a entrevista directora di Servicio di Impuesto Luenne Gomez- Pieters
riba entre otro algun belasting nobo cu Hulanda kier introduci.
Pieters a splica di e asina ama box 3 inkomen cu Hulanda tin, cu ta un impuesto cu hende ta paga riba nan ‘vermogen’, esta nan bienes.
“Aworaki Hulanda kier haci algun cambio, unda cu no ta haci un calculacion di bo bienes pa dicidi kico bo tin cu paga”.
Nan ta bisa cu bo tin cu paga belasting riba e ‘werkelijke rendement’.
No ta importa pues si enberdad bo a haya por ehempel dividendo, interes of bo a bende bo bitcoins.
Ta na final di aña nan ta bisa cu bo bitcoins tin un balor di tanto y ta esey ta e belasting cu bo tin cu paga, segun e director di DIMP.
El a splica cu ta algo cu ta bay hopi mas leu cu e sistemanan cu tin awor na Aruba.
“Na Aruba ainda nos no conoce vermogensbelasting ainda, pero si ta asina cu si bo tin accionnan den un compania y bo bende esakinan, bo tin cu paga inkomstenbelasting riba e balor di e accionnan”.
Pues e no ta un balor ficticio, pues no ta cobrabo e belasting si bo no a bende, segun Pieters.
“Cerca nos si bo bende bo accionnan of bo a ricibi pago di dividendo of interes, eseynan ta trigger e cobransa”.
Esaki ta temanan cu mester bin riba agenda pa wordo trata, pa wak con lo mester cambia ley pa riba termino largo introduci un sistema nobo of no, segun e director di Servicio di Impuesto.
