ORANJESTAD (AAN) – Den e Conferencia di Prensa, yama pa e director di IBiSA, Juni Farro, tambe tabata presente Rafael Perez,
ken desde aña 2018, ta Race Director di Carera, y den e caso aki di Turibana 10K, cu ta bay tuma lugar na September proximo.
Perez a cuminza indicando cu esaki ta un carera di hopi reto, no solamente pa hinke den otro, pero mester tene cuenta cu otro aspectonan, por ehemplo e clima.
Papiando di locual ta bay sosode dia 8 di September proximo, Rafael Perez a reitera cu inscripcion a habri y pa corda cu pa participa y asegura bo lugar, door cu e lugarnan ta limita, mester bin cu prueba di pago, sea haci na IBiSA of online.
E ora ey e participante ta haya su distintivo ya sea individual cu e aña aki ta haya color orange. E aña aki lo reintroduci “Kids & youth run” cu lo haya color biña, y e duo teams lo haya color geel.
E duo teams lo wordo parti atrobe den dos, cualnan ta “duo teams open” y “duo teams gubernamental”, pa nan reta otro, Perez a splica.
Un recordatorio y suplica a bay pa tur automobilista y pueblo di Noord, di cual nan a haya cooperacion enorme di nan, pero pa tene cuenta pa ora nan wak e baricada, esey kiermen cu e caminda ta cera, pa cuida e muchanan y tur participante pasobra e seguridad ta hopi importante.
Rafael Perez a gradici e trabao enorme cu tur aña ta wordo haci pa Cuerpo Policial (KPA) su departamento di Planologie. El a agrega cu hopi importante ta “Volunteer Motor Unit” cu tur aña tey y no ta yuda IBiSA so, pero tur caminda cu nan por yuda. Entre otro, el a menciona DOW, ALBO, SETAR, Cruz Cora, Brandweer, Trahadornan di IBiSA.
“Nos ta un team y si e team aki no funciona nos no por haci e eventonan aki. Tambe mi ta gradici Ministerio di Deporte cu ta duna nos un apoyo enorme na tur nos careranan”, Perez a señala.
E ruta ta conoci, e ta cuminza na MFA Noord, ranca bay rechting noord, na haltura di Noord Supermarket, bira na man robes, bay rechting bay abao, na haltura di Tu Casita ta bira na bo man drechi pa despues na Porta al Sole Condominiums bira na man robes, rechting e rotonde di Marriott.
Eynan ta subi Avenida Nelson Oduber direecion Noord unda ta conecta cu Malmokweg pa bay zuid y bek MFA noord. Perez a indica cu e distancia ta 10.5 Kilometer.
