Concierto cancela di Diasabra anochi...
ORANJESTAD (AAN): Diasabra anochi riba tereno di Harbour Arena tabatin un concierto prepara cu a ser yama ‘Duelo de Generos’, cu actuacion di Yeison Jimenez y Elder Dayan Diaz. E dos cantantenan aki di musica popular Colombiano, tabata planea pa subi escenario cu e grupo local Rumba Caribeña, D’Licious, y DJ Yeimy.
Sinembargo algo no a bay bon, y na yegada di e artistanan aki cu avion, oficialnan di Inmigracion no a laga nan drenta e isla. Pasobra oficialmente no tin ningun documento oficial cu ta regula nan entrada.
Consecuencia di esey ta cu ambos cantante a haya nan ta subi avion bek y keda sin presenta den e concierto, cu claramente a wordo cancela Diasabra anochi.
E promotor local a tira tur culpa riba Dimas y Inmigracion y cu tin mal comunicacion entre nan.
Pero Dimas a reacciona mesora riba e promotor, y cord’e cu e reglanan basico keto bay ta valido! Bo mester entrega peticion minimo 10 dia (di trabao) prome cu e evento!
Un boletin emiti Diadomingo door di Dimas, ta indica cu e promotor no a tene cuenta cu e procedimento aki pa evento cu artista internacional.
Den e caso di e concierto di ‘Duelo de Generos’ aki, Dimas a splica cu e peticion di permiso pa e artistanan di Colombia hunto cu nan acompañantenan a ser entrega den dos batch respectivamente 2 y 3 dia prome cu e evento.
Pues envez di e 10 dia minimo, a haci esaki 2 dia prome. Cu esaki e promotor tabata demasiado laat.
Pa evita cualkier inconveniencia den futuro, Dimas ta haci un suplica na tur organizador y promotor responsabel di eventonan cu artista- of personanan cu lo bin for di exterior, pa regla tur procedimento di permiso cu anticipacion y no menos cu 10 dia laboral prome cu e evento.
