*PAHO ta haci yamada pa cera gap den vacunacion
ORANJESTAD (AAN): Organisacion Pan-Americano di Salud (OPS/PAHO) ta pidi e paisnan den e continente pa fortalece actividadnan di vacunacion, mehora e vigilancia di malesa y accion, mientrastanto cu e casonan di sarampi ta sigui subi den e region. Te 8 di augustus 2025, a registra 10.139 caso confirma di sarampi y 18 morto relaciona den dies pais, un aumento 34 biaha mas grandi cu mesun periodo den 2024.
E casonan ta relaciona principalmente vacunacion hopi abao: 71% di e casonan ta den persona no vacuna y 18% mas na persona cu status di vacunacion desconoci. Den 2024, e cobertura cu prome dosis di e vacuna MMR (sarampi, cacheton y bruela) a yega na 89%, y cu dosis dos a subi di 76% na 79%. Pero e nivelnan aki ta ainda bou di e 95% recomenda pa preveni brote.
“Dos dosis di e vacuna ta hopi sigur y efectivo pa preveni sarampi. Pa para e brotenan, paisnan mester fortifica vacunacion rutinario y haci campaña specifico den comunidadnan di riesgo halto,” a bisa Dr. Daniel Salas, gerente di programa special di vacunacion integral na PAHO.
Pais cu mas caso ta: Canada (4.548 caso), México (3.911 caso) y Merca (1.356 caso). Otro pais cu caso confirma ta: Bolivia (229), Argentina (35), Belize (34), Brasil (17), Paraguay (4), Perú (4) y Costa Rica (1). Paraguay ta e ultimo pais cu a raporta un brote e aña aki. Mortonan a keda registra na México (14), Merca (3) y Canada (1). Na México, e mayor parti di e mortonan ta den hende indigena di edad entre 1 y 54 aña. Na Canada, un caso di sarampi congenito den un baby a resulta fatal.
Dos tipo di genotipo di e virus ta causa e brotenan. Un di nan ta presente den ocho pais, particularmente den comunidad menonita den Canada, Merca, México, Belize, Argentina, Bolivia, Brasil y Paraguay. Sarampi ta contagioso hopi fuerte, y ta propaga lihe den comunidadnan no vacuna, specialmente den mucha chikito. Data recien ta indica cu tin mas caso pafo di e comunidadnan aki tambe.
PAHO ta duna asistencia tenico directo pa duna sosten na investigacion di caso, respuesta na brote, diagnostico di laboratorio y vacunacion. Ta pidi e paisnan pa logra y mantene e nivel di vacunacion halto (minimo 95% cu dos dosis), reforsa sistema di respuesta rapido, haci campaña masivo den areanan di riesgo, detecta caso na tempo y traha cu comunidadnan pa yuda contra desinformacion relaciona cu e vacuna.
PAHO no ta recomenda restriccion di biahe, pero ta conseha tur biahero pa ta vacuna, inclui mucha di 6 pa 11 luna den area cu brote activo.
America a elimina transmision endemico di sarampi na 2016, pero e virus ta sigui circula mundialmente y e grupo cu ta duda di vacuna ta pone un reto pa mantene e logronan.
Riba potret: Dr. Salas di PAHO.
