ORANJESTAD (AAN): Ya ta conoci cu riba e prome Diasabra di luna, lo tin mainta un Santo Sacrificio di Misa tanto na e Kapel di Alto Vista,
como tambe e Kapel di Blue Army na San Nicolas. Esaki lo start pa 7:00 am riba Diasabra 4 di Mei 2024.
Prome cu Santo Misa ta resa Santo Rosario pa 6:15 am, “Misterio Gososo”, despues ta sigui cu Salve Regina.Ta invita tur deboto y fielnan di Mama Maria pa asisti na e Santa Rosario prome cu Santa Misa. Luna di Mei ta luna dedica na La Birgen di Rosario di Fatima.
Riba 13 di Mei ta recorda e prome aparicion di Mama Maria na e 3 wardadornan chikito na Fatima. Corda riba e palabranan principal di la Birgen di Fatima na e 3 wardadornan chikito: “Bosonan kier ofrece na Dios boso sacrificionan chikito acepta sufrimentonan cu E ta manda pa boso, pa duna reparacion di honor na Su Divino Mahestad pa picarnan numeroso pa cual E ta hay’E ofendi? Bosonan kier sufri tambe pa combercion di pecadornan y pa duna satisfacion pa blasfemia y ofensanan cu nan ta haci na Mi Curason Inmaculada?
Den tur parokia na Aruba tin debotonan di Mama Maria, asina cu 4 di Mei ta prome dia novena. Mama Maria ta entercede pa nos na nos Tata Celestial. Cu tur fielnan bin resa e Santo Rosario pa bienestar di henter comunidad di Aruba, tambe Papa Francisco, Obispo Luis Secco, tur sacerdote, Diacono y laiconan cu ta hiba e bon noticia pa e pueblo di Dios. Pa nos Gobernantenan y tur cu ta carga responsabilidad pa nos pais Aruba. Pa enfermonan den exterior. Cu Dios Santo sana enfermonan y pronto nan regreso.
Luna di April ta dedica na Hesus Misericordioso.
Cu Mama Maria scucha sclamamento di esnan cu ta biba cu miedo y hamber. Sin cas, sin awa pa bebe y sin cuminda. Henter nan bida ta destrosa bou di gera y perdido di nan sernan keri. Mas cu nunca, ban resa Santo Rosario pa PAZ na Medio Oriente. PAZ den hogarnan na Aruba y nos ruman nan riba otro islanan
Ban hinca rudia busca refugio na nos Mama Celestial. Den nos oracionnan resa pa Ucrania y Rusia cu nan por yega na e pas desea y Palestina cu ta sufri masha.
