ORANJESTAD (AAN) — Tur informacion cu DIARIO a ricibi di parti di Quanten ta indica cu e compania ta seriamente interesa pa establece su mes na Aruba y ta papia concretamente di e posibilidad pa ya na Mei 2021, Aruba por conoce inicio di su
proyecto pa bini cu un refineria nobo.
Den e splicacionnan cu Quaten a duna, ta wordo indica cu lo deshaci di e aspectonan bieu di un refineria pa introduci un concepto nobo den e ramo aki.
Pa e generacionnan mas hoben na Aruba, preguntanan cu DIARIO a lansa ora a papia di refineria, por parce poco straño. Pero e preguntanan aki ta directamente mara na e desaroyonan na Aruba for di momento cu Lago a cera su porta.
E hecho cu Lago a bay, tabata tin hopi resultado historico. No ta den tur detaye historico nos kier drenta awor, pero sigur nos kier sigui amplia riba un punto cu awor Quanten mes ta trece dilanti.
Medio Ambiente, e aire cu nos ta respira y e loke ta base pa sector di turismo, ta loke a bini dilanti den informacionnan cu nos a ricibi di e compania Mericano cu ta interesa den un refineria na Aruba.
Esaki pues a haci nos bolbe na e tempo directamente despues di ciere di Lago, despues di Status Aparte di Aruba, cu a conoce dirigentenan completamente diferente di loke a pensa ora Aruba a lucha pa Status Aparte.
Pero e cambio aki tabata directamente relata na e hecho cu Lago a bay y esaki a bira un arma politico.
Despues di Status Aparte, e prome gobierno di Aruba como pais, a introduci turismo como base economico. Uno di e resultadonan di turismo absoluto como base economico pa Aruba, tabata cu a papia di desmantela e refineria bieu.
E tempo plannan pa desmantela e refineria a conduci na rapportnan cu a indica cuanto problema un refineria ta pa un pais y a surgi dos campo.
Tabata entrada di Gobierno Nelson Oduber cu a trece un operador nobo pa e refineria y asina a pone fin na e riesgo cu e refineria bieu lo a wordo desmantela segun plan.
Despues di tempo, aunke turismo a sigui crece, habri refineria a keda un asunto serio y por mira con na 2016 e mes partido cu kier a desmantela e refineria, a bini cu Citgo pa sigui cu e refineria cu DIARIO a considera un refineria cu mester a bay cu pensioen di behez.
Awor cu Quanten a bati na porta, nos a bay averigua con Quanten ta bay atende cu e problema aki.
E motibo pa nos haci esaki ta uno logico, Cierto personanan cu na Merca ta asocia nan mes cu Quanten, ta personanan cu ta conoci pa nan lucha pa medio ambiente.
Ta den e cuadro aki ta papia di un proyecto di refineria cu atencion importante pa medio ambiente.
Quanten ta papia di energia limpi, di abandono di uzo di loke ta afecta medio ambiente pa asina garantisa e naturalesa cu Aruba como isla turistico mester proteha.
Informacion cu nos a obtene for di California, e estado Mericano conoci pa su caracter hopi moderno, ta mustra cu medio ambiente ta un lucha special di Quanten cu tin den su team personanan di renombre riba proteccion di Medio Ambiente.
Hasta Quanten ta trece dilanti, cu reconociendo e importancia di turismo pa Aruba, e ta pone su conocemento den practica.
Informacionnan cu nos tin di Gobierno Wever-Croes ta indica cu sigur Prome Ministro Evelyn Wever-Croes ta considera e aspecto di medio ambiente sumamente importante debi na e impacto pa futuro.
Por spera cu den mas o menos un luna, e deseonan di tanto Quanten como Aruba pa e compania yega Aruba, lo haya contesta, cu no solamente lo por nifica un refineria practicamente nobo pa Aruba pero tambe un futuro di industria cu ta yuda Aruba proteha su medio ambiente den e epoca moderno cu ta permiti turismo y refineria tene man di otro como pilar economico.
