ORANJESTAD (AAN): Diahuebs 13 di januari 2022, pa 6 or di atardi tin resamento di Santo Rosario y Oracion na Monumento di “Inmaculado Curason di Maria” na Santa Cruz.
Pueblo di Dios y tur grupo di oracion ta invita caresidamente pa bin resa na nos Mama Celestial. Tur loke nos mester pa nos pueblo den e tempo di pandemia aki ta oracion. Cu mas fielnan acudi diahuebs atardi na e monumento pa 5.30 pa prepara nos mes pa e oracion sublime na nos dushi Mama Maria. Cu a acepta pa bira mama di nos Salbador Hesu-Cristo.
Cu respet nos ta persevera den oracion y cu orden nos ta cuminsa na ora 6 en punto. Cu tur fielnan presente y cu debocion den ambiente di oracion. Na cas nos ta cuminsa prepara cu bisti nos scupulario y medalia di e Dos Curasonnan di Hesus y Maria.
E scapulario nos ta bistie ora special manera riba tur 13 dia di cada luna y dianan special di fiesta di Inmaculada Curason di Maria. Pastoor Jairo ta presente y ta pidi tur fielnan pa resa cu debocion, articula nos oracionnan y resa na voz halto.
Asina tur presente por tende. Nos ta resa pa nos sacerdotenan, diacononan y tur doctor y nursenan cu ta traha na bienestar di e pueblo di Dios. Nos Mama Celestial, cu ta sufri tanto pa desobedencia di hopi hende na Su Yiu Dibino Hesus. Laga nos tur resa pa reina feleicidad den cada hogar y tambe na trabao unda nos ta pasa hopi oranan di nos bida.
Tur dia nos ta resa nos Santo Rosario. Ta bin hunto como ruman den Cristo y yiunan di Dios, cu alegria y goso pa resa e Santo Rosario. Sinti bo mes e yiu di Mama Celestial, E ta anhela bo presencia e atardi aki. Bo ta invita pa bin 5.30 or di atardi riba Plaza na e Monumento di Inmaculado Curason di Maria, pariba di misa di Sta.Cruz. Ta cuminsa resa “Angel di Señor”, sigui pa e Santo Rosario. Tur diahuebs ta resa misterio “Luminoso ”, cu canto y oracion pa alaba y gradici grandemente nos Mama Celestial y Su Dibino Yiu.
Despues ta sigui Santa Eucarestia den misa.
