Marlon Sneek, Presidente:
ORANJESTAD (AAN): Presidente di Parlamento, Marlon Sneek, a brinda informacion relaciona cu e proximo reunionnan cu mester tuma luga den sala di Parlamento. El a indica cu nan a cuminsa programa caba pa loke ta bin despues di receso cu ta caba awe 19 di augustus.
Pa diaranson 20 di augustus ya caba ta inicia cu un reunion publico pa trata presupuesto supletorio. Tin un par di ‘vragen uur’ cu a wordo pidi y nan ta yama caba. Banda di esaki tin otro reunionnan publico cu a wordo pidi di diferente miembro.
Sneek a indica cu pa loke ta di 20 pa 30 di augustus ta bay ta simannan basta ocupa caminda ta bay atende cu tur locual tin pendiente pa asina por yega na un calendario actualisa. El a bisa cu como presidente e tin e responsabilidad di garantisa pa tin e reunionnan cu a keda pidi y pa cumpli cu nan.
El a remarca cu un di e reunionnan importante ta tocante presupuesto cu mester drenta 1 di september y asina cu esaki drenta lo stipula un tempo pa e parlamentarionan haya suficiente tempo pa pasa den dje y haci nan preguntanan, pa gobierno por contesta.
Si tur cos cana segun schedule, den luna di october lo ta bon pa cuminsa cu tratamento di presupuesto 2026.
