Parlamentario di AVP, Sr. John Hart:
ORANJESTAD (AAN): Parlamentario di AVP John Hart ta solicita pa Parlamento di Aruba habri un debate cu gobierno tocante Landsverordening Algemeen Pensioen (LAP), cu desde 2011 ta regula pensioen pa empleadonan den sector priva. Segun Hart, despues di 15 aña ta necesario pa evalua funcionamento di e ley, fortalece supervision y garantisa cu derecho di trahadonan ta wordo proteha den practica.
“Bienestar di nos trahadonan mester ta un prioridad. Desde 2011 tin un ley pa regula pensioen den sector priva. Durante e 7,5 aña cu MEP tabata na mando, e ley aki no a haya e atencion necesario y nada concreto a wordo logra. E prome mocion cu mi a presenta ora mi a drenta politica tabata hustamente pa proteha trahadonan di Aruba,” Hart a enfatisa.
LAP a wordo introduci durante Gabinete Mike Eman I, debi cu hopi empleado den sector priva no tabatin un pensioen adicional banda di Algemene Ouderdomsverzekering (AOV). E ley a crea e obligacion pa dunado di trabou y empleado participa den un sistema di pensioen, pa asina brinda trahadonan mas siguridad financiero na momento cu nan yega edad di retiro.
Pension ta un derecho pa cual trahadonan ta paga prima durante hopi aña, cu e expectativa cu na un edad mas avansa nan por conta riba siguridad financiero y un bida digno. P’esey, segun Hart, no ta suficiente pa e derechonan aki ta bon regula solamente riba papel; e sistema mester funciona debidamente den practica tambe.
E evaluacion cu Sociaal Economische Raad (SER) a presenta na 2017 a señala e necesidad urgente pa un instancia supervisor controla cumplimento cu e ley. Hart ta indica cu señalnan cu a yega cerca dje durante e ultimo tempo ta mustra posibel deficiencianan den ehecucion y supervision di LAP.
“Nos a mira caso den corte caminda dunadonan di trabou ta retene contribucion di pensioen for di salario di trahadonan, pero no ta deposita e placa den un fondo di pensioen. Trahadonan no semper sa si nan prima ta wordo paga, mientras dunadonan di trabou tambe ta experimenta falta di claridad. Ta tempo pa pone ordo,” Hart a declara.
Dia 25 di augustus 2025, Hart a presenta un mocion cu a urgi Gobierno pa pone ordo den e situacion existente y nombra, sin mas tardanza, un supervisor pa LAP. E mocion, segun e parlamentario, tabata un expresion cla di e deseo di Parlamento pa yega na un sistema di supervision efectivo.
“Awor cu a pasa un tempo considerabel, ta momento pa haci un evaluacion y pidi gobierno splicacion. For di Parlamento, e asunto aki tin mi atencion completo. Supervision ta importante, pero mester tin tambe mas comunicacion y conscientisacion, pa informa tanto trahado como dunado di trabou tocante nan derechonan y obligacionnan bou di e ley,” Hart a afirma.
Gobierno a inicia dialogo cu instancia manera SVb, APFA, companianan di seguro, sindicatonan y organisacionnan comercial pa evalua e ley. Sinembargo, Hart ta considera necesario pa parlamento ricibi claridad tocante resultado di e dialogo, e pasonan cu gobierno lo tuma y e periodo dentro di cual e supervision efectivo lo wordo realisa.
“Mientras oposicion ta ocupa su mes cu polarizacion y division, ami ta concentra riba solucionnan concreto pa trahadonan di Aruba. Como representante di pueblo, mi tin e responsabilidad pa controla maneho di gobierno. P’esey mi a entrega diferente pregunta na Minister Presidente, solicitando pa habri e debate tocante e sistema general di pensioen pa sector priva y e legislacion cu mester proteha derecho di nos trahadonan,” John Hart a conclui.
