ORANJESTAD(AAN): Diamars atardi Sindicato di Aduana Aruba (SADA) a tene un conferencia di prensa
pa reacciona riba e conmocion cu tin relaciona cu un entrevista cu SADA tabata tin cu prensa, despues cu e sindicato a gana un caso den corte.
“Prome Minister tambe a duna comentario riba algun punto cu nos a trece dilanti encuanto DRH y funcionamento di e departamento aki, pues nos a haya prudente y na su lugar pa yama un rueda di prensa pa duna algun punto y duna algun splicacion riba esaki”, segun presidente di SADA Edward Maduro.
El a splica cu hunto cu otro sindicatonan SADA pa añanan largo ta trece diferente keho dilanti na e Gobierno aki.
“Mi tin cu bisa cu desde cu e Gobierno aki a sinta, nos a wak un aumento drastico den e inhusticia cu ta tumando lugar contra ambtenaarnan y specialmente esnan di SADA”.
Nos a trece esaki hopi biaha na conocimento di Gobierno, pasobra constantemente durante cada reunion cu nos por a trece esaki dilanti nos a haci esaki, incluyendo na Prome Minister pasobra DRH ta cay directamente bao di e Proem Mandatario, segun Maduro.
El a sigui bisa cu hopi caso cu cual ambtenaarnan ta bay corte, eingenlijk ta asuntonan cu por a wordo resolvi na mesa.
Segun Maduro, ta mustra como si fuera Gobierno y DRH ta haya un gozo ora cu un ambtenaar tin cu cana un caminda di cruz den corte pa busca su derecho.
“Na varios occasion a manda carta pa Prome Minister pa e sinta cu nos y yega na un solucion riba e manera con DRH ta maneha cu e HR di Gobierno, pero lamentablemente nos no ta haya oido, ni despues cu nos manda rapel”, segun Maduro.
El a indica cu como sindicato di Douane cu ta cay bao di minister di Finanzas, SADA no ta haya oido di e mandatario.
“Topiconan cu no mester bay corte ta bay corte, pasobra nos no por haya audiencia cu e minister di Finanzas”.
Ta como si fuera nos mester mendiga pa haya un cita, segun presidente di SADA, kende a indica cu cada biaha esaki ta wordo cancela of hala.
