Meverly Romano, Relacionista Publico: *Pa ley ta existi e posibilidad di duna descuento
ORANJESTAD (AAN) – Meverly Romano, Relacionista Publico di Departamento di Impuesto, a declara den entrevista cu DIARIO, cu probablemente, Departamento di Impuesto lo por cobra nan e primanan di AZV, AOV/AWW. E primanan aki si, lo tin cu cobra manera cu e cobranza definitivo di Inkomstenbelasting wordo fiha, Servicio di Impuesto ta cobra e primanan tambe.
“Pa ley tambe ta existi e posibilidad di duna un descuento ora cu e persona su entrada pa cobra e prima no ta asina halto, e ora ey nos tin cu aplica un descuento riba e primanan cu nos lo mester cobra. Por ehemplo, un persona cu su entrada den 2020 ta bao di 6.400 florin pa aña, e ora ey nos no ta cobre AZV, AOV ni AWW. Si e ta subi cada bez nos ta aplica un descuento. E por ta 30%, 40%, 60%, pues asina nos ta keda aplica un descuento y pa nos por cobra e persona pa medio di un cobranza definitivo.
“En corto, e Fase uitkeuring ta un entrada cu mester paga belasting riba dje, pero si no ta pasa 28.860 florin pa aña e persona su suma di Inkomstenbelasting lo ta nihil. Si nos por cobra e prima di AZV, AOW/AWW, pero depende kico ta e suma cu e persona ta ricibi total durante 2020, e ora ey nos ta wak si e ta bin na remarca pa un descuento riba e suma di e prima cu e lo mester paga.
E cobranza di aña 2020 nos ta bay saca nan den curso di otro aña, y na momento cu e persona ricibi su cobranza e tin semper e posibilidad di haci un areglo di pago. Nos ta recomenda pa e cera un areglo si e no por paga e suma dentro di dos luna.
A base di areglo di pago, nos ta determina e capacidad di pago di e persona, y e ora ey nos ta fiha e suma cu e lo mester paga riba e cobranzanan tur luna. Kiermen, pa aworaki ta necesario si, pa yena e formulario di declaracion y caminda cu e persona cu a ricibi FASE lo mester declara e entrada aki na pregunta 14 F, cu yama ‘overzicht van periodieke uitkeuring’. Eynan e ta declara su entrada di FASE y Inspector di Impuesto lo haci e calculacion nan despues”, Meverly Romano a señala.
