Director di Asociacion Trabao di Hubentud Aruba (ATHA), Cyndi Kelly-Mathilda, a elabora riba e proyecto mas nobo cu ATHA a introduci: “Gen297”.
Cyndi Kelly-Mathilda a duna di conoce cu, pa algun aña caba, ATHA ta den preparacion pa por trece un programa despues di scol, pa nos hobennan.
“Despues di un sondeo cu a tuma lugar pa asina duna informacion, tocante e Tratado di Derecho di Mucha na Aruba, via e Youth Rapport cu a wordo traha, a bin e pregunta na e hobennan tocante e necesidad pa bin cu un programa despues di scol, unda cu e reaccion tabata hopi positivo”, Cyndi Kelly-Mathilda a splica.
El a relata cu desde eynan, a cuminza cu e preparacion y asina a sinta cu diferente organizacion cu ta traha riba e area social y tambe den educacion y, den forma di un dia di estudio, en cooperacion cu CEDE Aruba, a hinca den otro e prome skelet pa loke ta trata e programa despues di scol.
“Akinan, e organizacionnan hunto a crea e vision, mision, a traha den grupo y a crea un meta. Y tambe, a trece nan puntonan dilanti, door di e experiencia cu nan tabata tin den diferente programa den pasado. Eynan nos a cuminza traha duro, pa yega na e fondonan necesario, pa por cubri un programa despues di scol” director di ATHA a señala.
El a expresa cu gradicimento na Social Crisis Plan, CEDE Aruba, y “Samenwerkende Fondsen Cariben”, cu ta e sostenedornan financiero di e proyecto di ATHA “Gen297”.
“Gen 297, ta un programa unda cu e hoben, despues di scol, por bin merdia. Nos prome programa tabata den Centro di Bario Brasil, tur dia di Dialuna pa Diabierna, unda e hobennan tin un rato pa comparti cu otro, disfruta di combersa, den e aspecto social, y nan ta haya un cuminda cayente”, Cyndi a indica. Ta asina cu ATHA ta pidi un contribucion mensual di e mayornan.
El a agrega cu esaki ta un proyecto piloto unda ta buscando e miho manera pa ofrece e programa aki na e hobennan.
“Bunita di e proyecto aki ta cu nos a traha hunto cu EduCare Foundation di Los Angeles, California, unda nan tin hopi aña di experiencia trahando cu un proyecto asina, y eynan nan a duna nos diferente manera di experencianan cu nan mes a pasa aden pa hinca un programa den otro”, e director di ATHA a subraya.
El a referi tambe na e importancia di e contribucion di e hoben mes, como participante, unda cu e hoben mes ta indica kico ta su necesidad y su deseonan pa loke ta un programa despues di scol.
“Di aworaki te Augustus, nos ta brindando un programa cu e organizacionnan cu nos ta traha hunto, y entrante Augustus e mester draai un programa cu e hobennan ta hinca den otro”, director di AHATA a splica.
El duna como ehemplo, si e hoben bisa cu e kier sa kico ta tennis di beach. Anto ta wak si tin mas hoben cu e mesun necesidad aki ATHA ta bay busca pa sa kico ta e posibilidad pa trece esaki den nan programa. “Di e manera aki e hoben tambe ta sinti su mes como parti di e programa y ta sintie cu e tin un convenio tambe, pa forma parti y sigui sostene e otro hobennan den nos comunidad”, director di ATHA, Kelly-Mathilda a comenta.
