Sannin Daou, PR: Den ruta San Nicolas-Santa Cruz:
ORANJESTAD (AAN) – E Relacionista Publico di Arubus, Sannin Daou, a hiba palabra den e conferencia di prensa yama pa DOW, en conexion cu e trabaonan di mantencion di e brug di Spans Lagoen, cu ta bay inicia dialuna proximo, esta 25 di Juli.
Daou a expresa cu no ta keda otro opcion cu avisa e usuarionan di Arubus cu nan mester desvia na e rotonde di Pos Chikito unda nan lo pasa parti paden, y lo sali bek na Drive Inn y sigui e ruta normal.
Esaki ta explicitamente pa e busnan di lineanan 1, 2 y 3, cu ta core entre Oranjestad y San Nicolas, y esaki lo tuma lugar entre 9’or di mainta pa 7’or di anochi. El a remarca cu na e momento cu e brug habri bek, di 7’or di anochi padilanti, Arubus lo core e ruta normal cual lo core riba e brug grandi atrobe. Esaki lo tuma lugar entre 7’or di anochi y 9’or di mainta.
Sannin Doau ta pidi e usuarionan cu na momento cu nan mester tuma bus cana un tiki pa bay e caminda paden unda Arubus lo por piki nan pa subi bus y sigui e ruta normal.
“Di parti di Arubus, tambe nos kier pidi e demas automobilistanan y coredornan di truck pa core mas cauteloso riba e brug chikito. Arubus tambe lo core mas cauteloso mirando cu pa nan e peligro mas grandi lo ta na e brug chikito e banda paden (e brug di Tele Aruba), mirando cu si bin di pariba of di pabao, no tin un bista directo riba e brug. Na momento cu bo ta yega bo ta un tiki riba dje locual ta un tiki peligroso pa bay break si acaso tin un vehiculo riba dje caba”, Sannin Daou ta alerta.
El a remarca cu el a compronde cu lo tin hendenan eynan pa indica ken tin preferencia. Arubus kier pone mas atencion riba e parti di seguridad pa tur automobilista y coredornan di truck tin na cuenta, cu ta bay tin hende para eynan entre 9’or di mainta te 7’or di anochi, y tambe pa purba di scucha di e hendenan aki pa respeta nan, na momento cu nan ta dirigi e trafico y indica ken tin preferencia, pa evita cu por tin cualkier accidente, locual ningun hende kier.
