Nathalie Maduro, directora LVV-Santa Rosa:
ORANJESTAD (AAN)-- Directora di LVV-Santa Rosa, den entrevista cu Matutino DIARIO a sigui bisa, cu e bon ta cu el a tuma nota cu tin hopi otro mercado tambe rond. “Mi mes a bishita uno Diadomingo siman pasa na Outreach Farm, y mi a wak cu tin un colegialidad entre e benders awendia, y cu tin interes tambe den e comunidad pa sostene nos, cerca nos agricultornan y nos artesanonan. Esey, pa Santa Rosa, sigur ta algo positivo, pasobra e ta algo cu pa añanan nos a purba di trece: e union entre e productornan, pero tambe e consistencia den e productonan cu ta wordo ofreci.”, Nathalie Maduro a señala.
Tambe el a subraya cu e ta hopi satisfecho, con e mercadonan di Santa Rosa ta bayendo, pero comunidad mester sigui sostene e produccion local. El a comenta cu el a wak un lechuga cu un persona a publica riba facebook, cu no ta producto local, y su prijs ta 10 florin, mientras cu por haya lechuganan local cu a wanta hopi largo den frishider, pa 6 florin y so &so e no ta pasa 7 florin.
“E ta mustra bo duidelijk cu atrobe, nos ta den un temporada di secure, y e hendenan ta produciendo ainda. Tin cu ta produci den e sistema hidroponico y esey ta un tiki mas facil pa bo por controla e uso di awa, pero bo tin tambe esnan cu ta plantando den e sistema tradicional, gewoon den tera. Semper locual cu nos ta aconseha como Santa Rosa ta pa planifica bon”, Nathalie Maduro a indica.
El a agrega cu si bo wak cu bo limitacion ta awa, no produci den escala grandi pero importante ta pa sigui produci.
“Prijsnan ta bay sigui subi, y no ta Aruba so. Na Hulanda tambe e prijs di cuminda ta mucho halto, y un pais cu ta produci su mes, y na Aruba tambe. Cuminda ta algo cu semper nos mester di dje y prijsnan no ta bay baha! Semper mi mensahe tabata pa cuminza chikito, planta den bo cura pero nunca descarta cu e por bira un negoshi chikito. E ta un conseho tambe cu mi ta duna hopi di e studiantenan ora cu nan bin core stage”, Nathalie Maduro a acentua.
