St. Maarten a pidi yudansa tambe di Cuerponan Policial di demas islanan
ORANJESTAD (AAN): Manera cu DIARIO a trece dilanti siman pasa, e situacion di crimen violento a tuma algun rumbo indesea na isla di St. Maarten. Atraconan arma y violento ta socede dilanti multitud di hende cu ta gozando di nan dia na popular centro. Esaki y hopi mas a pone cu pasenshi di comunidad y tambe di Parlamentarionan caba, y nan a cuminza exigi claridad di Ministro.
Esey a pone cu desde siman pasa caba, Ministro di Husticia, Nathalie Tackling a cuminza acerca partnernan den mundo di seguridad na e otro islanan den Caribe (incluyendo Aruba), pa check si por duna nan un man pa stop e aumento espantoso di crimen.
Ministro a pidi esaki na autoridad Hulandes, y nan a dicidi mesora pa pone e Mariniernan di descatamento di St. Maarten subi caya, y desde Diabierna 12 di December caba nan ta core rond riba e isla pa sostene Polisnan.
Esaki ta pa mantene ordo publico, y asina garantiza seguridad. Pueblo a bira spanta cu e cantidad di casonan extremo registra riba e isla, y e presencia di militarnan lo por decurasha criminalnan di sigui comete nan fechoria.
Pa dos siman largo, Mariniernan lo bay ta haciendo e.o. control di trafico y patruyahe hunto cu miembronan di Cuerpo Policial di St. Maarten.
Defensa Hulandes a splica cu e apoyo na autoridadnan civil, ta un di e responsabilidadnan di Departamento di Defensa den Region Caribe.
Manera ta conoci, St. Maarten ta construyendo un prison aun mucho mas amplio compara cu esun existente. Pero Ministro a indica tambe cu lo mester di varios miyon Florin Caribense mas pa asina adkiri herment necesario pa Polisnan y Recherche por traha cu ne pa resolve crimen.
