Opinion: --- Pa tur alumno na Aruba por gosa di e mesun nivel di enseñansa, Gobierno mester tin normanan igual pa tur scol , pa tur alumno y pa tur educador di e mesun sorto di enseñansa.
Por ta Gobierno ta paga pa e cantidad di alumno na cada scol of den cada klas?
Of Gobierno ta djis paga , sin norma y sin control , tur gasto di un scol manera edificio , salario di empleadonan , material , buki etc etc?
Minister por duna pueblo un splicacion comprendibel y claro ariba ki base , segun cua normanan ( of no tin ?), Gobierno ta paga “schoolbestuur” y otronan pa duna/facilita enseñansa?
Parlamento sa of Parlamento tambe kier sa?
Si Aruba ( Gobierno/Parlamento ) kier duna oportunidad di educacion igual na tur alumno , Aruba mester stipula y tin norma segun cua ta paga “schoolbestuur” y otro nan.
Un ehempel di norma por ta e cantidad minimo y maximo di alumno den un klas of na un scol.
E norma di cantidad di alumno ta sirbi , por ehempel , ora mester dicidi si ta habri of no mas scol na Aruba of ora mester dicidi si ta habri mas klas of no na un scol .
Ora cu no tin suficiente alumno of educador , ta mas cu logico cu NO mester habri mas scol of klas , pero mester manda e alumnonan na un otro scol cu si tin espacio suficiente.
No por laga pa cada directiva di scol of otro , riba nan mes , dicidi si nan ta bin cu mas scol of klas.
No por , pasobra ta Gobierno ( pagadornan di belasting ) mester paga y no e directiva di scol of otro.
Pa por tin un bon planning di cantidad di scol , di cantidad di alumno y di cantidad di educador na Aruba , Gobierno mester ta encarga cu organisacion y reorganisacion di tur scol na Aruba hunto cu e “schoolbestuur” y otro nan.
Mescos cu ta papia di y aplica “formatie” den Departamento nan di Gobierno , mescos mester , si no tin , cuminsa cu “formatie” pa cada scol , como forma pa Gobierno tin mihor bista y por maneha su gastonan tur aña di forma responsabel.
No por ta asina si cu ta cada scol/directiva di scol ta dicidi riba su mes cuanto alumno e ta permiti den un klas ni cuanto klas e ta habri, pasobra asina ta crea diferencia/desigualdad ( klas cu poco / klas cu hopi alumno ) pa e alumnonan y pa e educadornan di e mesun sorto di enseñansa.
Si ta Gobierno ta paga pa duna educacion igual na alumno , ta Gobierno mester dicidi y stipula pa cada sorto di enseñansa y pa cada klas , cuanto alumno mester tin minimo y maximo den cada klas.
PREGUNTA : Gobierno tin normanan stipula cu tur scol/directiva di scol mester tene nan mes na nan?
Minister lo por , si no tin e informacion concreto , laga haci un inventarisacion di tur sorto di scol “di Gobierno” pa haya un bista/base pa compara cu e otro scolnan , “no di Gobierno”.
Hunto cu directivanan di otro scolnan , Gobierno mester por yega na stipula normanan general pa Aruba pa asina logra igualdad y balans pa tur sorto di enseñansa, na tur scol na Aruba, pa e alumnonan y pa e educadornan.
Pakico e pregunta y preocupacion?
Pasobra e gastonan di Gobierno pa enseñansa ta hopi halto y mester logra igualdad di calidad pa tur alumno y pa tur educador.
Cu un bon organisacion/reorganisacion di enseñansa , basa ariba normanan , Aruba por logra mas cu menos gasto.
Asina Aruba por inverti , loke spaar cu organisacion/reorganisacion , bek den mehora calidad di enseñansa.
Resultado ?
Mihor calidad cu igualdad den enseñansa pa menos gasto!
Pa falta di informacion concreto y exacto , impresion ta worde crea cu tin diferencia entre e scolnan cu ta duna e mesun sorto di educacion.
Minister, pa un prueba/proef , no ta mucho dificil pa scoge un sorto di enseñansa cu ta worde maneha pa diferente directiva di scol y compara e cantidad di alumno , e cantidad di klas y e cantidad di educador nan , etc etc di cada scol cu otro.
Por yega na saca conclusionnan si tin diferencia of no y si mester introduci of adapta normanan general cu tur directiva di scol mester cumpli cu nan , di moda cu Gobierno lo paga tur directiva di scol y otronan a base di normanan igual.
Parlamento sa con “ Enseñansa “ ta organisa y Parlamento sa cua ta e normanan cu Gobierno ta aplica pa paga e “schoolbestuur” y otronan?
No?
No ta na Parlamento pa controla gastonan di Gobierno y controla si Gobierno ta repartí finansas di forma responsabel entre “schoolbestuur” y otro nan?
BAN PA LOGRA IGUALDAD NA ARUBA BOU ALUMNO Y EDUCADORNAN
Robert Arends
