Pobresa na paisnan grandi den region lo aumenta drasticamente --- *Prijsnan halto ta afecta comunidadnan mas pober na mundo --- *Situacionnan social serio den vecindario di Aruba merece atencion
ORANJESTAD(AAN)—Kico e impacto di un guera mundial despues di un pandemia ta, por wordo sinti rond mundo.
Manera DIARIO a informa continuamente, paisnan grandi cu por ehempel dor di clima ta den un situacion sumamente dificil cu aumento di gas y azeta, mester a introduci areglonan special pa nan habitantenan enfrente prijsnan halto.
Aumento di costo di bida ta un realidad pa tur pais na mundo, cu ta registra instabilidad y no por mira e fin di situacion mundial actual.
E relacion entre Aruba y Reino ta haci posibel pa Aruba haya prestamo pa e por atende su necesidadnan actual.
No ta tur pais ta den e situacion aki manera a bini dilanti den investigacionnan cu nos a realisa riba e realidad general di region di Caribe y America Latino.
Situacionnan serio a wordo presenta di ciudadanonan di paisnan, cu pa medio di migracion tin contacto directo cu Aruba.
E realidad regional di Aruba ta uno sumamente preocupante manera por a comprende di informantenan cu ta papia di situacion social sumamente serio, debi na e prijs di cuminda y prome necesidadnan cu ta dal paisnan pober duro.
Aruba mester ta sigur alerta pa e situacionnan social den su region, manera historia a demostra.
E seriedad di problemanan social creciente den region di Aruba, a bini dilanti den e realidad di prijsnan basico di cuminsa pero tambe otro articulonan di uzo diario, cu atrobe ta conoce aumento di prijs.
“Pueblonan sumamente pober no a haya oportunidad di recupera despues di e Pandemia di Covid-19 cu a afecta economia mundial,” informantenan a splica den nos copilacion di datonan cu ta duna un bista real di loke ta pasa.
Hamber ta expresa su mes den vecindario di Aruba y e peliger di yegada di mas Venezolano cu ta trata di scapa e problemanan social serio na e pais, no mester wordo descarta.
Na cantidad di paisnan cu ta produci petroleo na America Latina, e aumento di demanda di petroleo a habri caminda nobo pa entrada pero no necesariamente esaki ta nifica cu paisnan por atende cu e problemanan basico di situacionnan social.
Aruba na e momentonan aki mester tene na consideracion, cu atrobe e por bira un asilo pa refugiadonan social den su region.
Pobreza a sigui crece pa e parti mas grandi di poblacion di un parti di mundo cu problemanan social grandi.
Fin di e crisis na Ukraine, cu hopi habitante na paisnan pober ni sikiera ta sigui, lo no nifica un cambio mundial di imediato.
Cu produccion mundial cu a conoce otro caida, falta total di stabilidad, paisnan pober ta pasa den situacionnan serio y hopi ciudadano di e paisnan pober ta sigui trata na huy na un futuro nobo cu ta duna mas speransa pa futuro.
E nivel di bida unico di Aruba, sigur ta destaca atrobe na momento cu hamber y miseria ta afecta region di Caribe.
Aruba mester ta prepara pa loke esaki por nifica pa intentonan di migracion ilegal den situacionnan di desesperacion social, cu segun organisacionnan internacional lo sigui aumenta.
Informacionnan oficial di Gobierno di Aruba, di cual nos por a tuma nota, ta indica cu Gobierno ta hiba un maneho cu ta proteha e trahador Arubano den admision di trahador di exterior.
Trabou tin sigur pa tur cu ta labora den defensa nacional y vigilancia di costanan di Aruba, cu un nivel di bida cu ta haci e pais, un atraccion pa hende cu na nan pais, ta biba den miseria.
