PALM BEACH: Imaginabo ta cumpra 217 Dollar na gasolin, pero ta djis paga 1.10 Dollar y e tanki a yena full.
Ta parce cu criminalnan ta buscando forma pa haya gasolin mas barata pa cumpra, y a logra haya un forma pa modifica diferente Pomp na algun Gasoline Station na diferente estado na Merca, pa asina haya sea Unleaded Gasolin of Diesel na prijs mas abao.
Aparentemente riba Dark Internet tin informacion ta circula con cada persona por traha e aparato aki, usando pieza cu bo por haya varios lugar cumpra. Finalmente e ta funciona cu 3 bateria plat di 9 Volt poni paralel, y bo ta agrega un remote-control receiver na dje.
E criminalnan ta usa oranan di anochi pa yega na e Pomp cu nan ta desea, ta usa yabi falso pa habri e cabinet di control, y den menos di 30 seconde ta pone e aparato aki den area unda tin e sensor cu ta detecta ora e motor di e pomp ta draai, y ta conta cuanto liquido ta wordo pasa door di dje.
Unavez cu e wordo poni riba dje, nan twist algun waya den e sistema, y mara esaki cu un tie-wrap, nan ta cera e cabinet bek y lock esaki. Ultimo tempo nan ta gusta pone esaki na Pomp #12, pasobra e parce di ta un number facil pa corda.
Aparato clandestino pa manipula: Den dia ora cu e Gasoline Station ta habri, nan ta yega eynan cu nan vehiculo Pickup bashi, y ta staciona esaki na Pomp #12. Prome cu el a baha di su auto, na un forma scondi el a primi un boton riba un remote control poni riba su stul. Despues el a baha y a hinca su credit card pafo na e pomp mes, y cuminza yena su vehiculo.
E remote control cu el a primi, a “wake-up” e aparato clandestino instala marduga den e Pomp. Esaki ta activa, y e circuito ta manipula cu e sensor.
Yenando e tanki di su vehiculo, e ta sinti cu hopi combustible ta yenando, pero e contador na e machine apenas ta draai. Despues di casi 5 minuut porfin el a yega na $1.00 riba e machine.
Loke ta pasando ta cu e aparato clandestino ta manipulando cu e sensor, y artificialmente e ta influencia esaki pa asina e no funciona bon y ta contando hopi slow.
Pa ora cu e yega na $1.10 riba pantaya di e pomp, e machine ta marca cu ta solamente 0.22 gallon so di combustible el a cumpra.
Pero e Ford F350 di e delincuente a yena cu 48 gallon, cu na Florida aworaki ta $217 full tank. Pero e delincuente a djis paga $1.10. E ta saca e slang, colge bek na e Pomp. E ta drenta su Pickup, y e ta primi scondi e boton di remote. Esaki ta desactiva e aparato clandestino den e Pomp.
Envez di a paga $217 pa yena e tanki full, el a djis paga $1.10 y e tanki di su Pickup ta yen.
Pues e siguiente chauffeur cu yega na Pomp #12, lo bay paga e prijs completo.
Detencion na Florida: E descubrimento aki a pone cu awor, diferente Gasoline Station ta pasa tur mainta ta habri e cabinetnan di Pompnan, pa mira si por tin aparato clandestino hinca aden. Polisnan na Florida tambe a haya hopi denuncia.
Hopi pickup ta bin pa colmo cu un tanki plat poni den baki, y esaki nan ta yena bay goal, principalmente cu Diesel. E meta di nan ta pa bay bende esaki na e prijs normal, y asina ta haci ganashi riba dje.
Na Lake Worth Beach, un oficial di Polis cu pa casualidad a pasa banda di un Gasoline Station, a mira un Chevrolet Avalanche cu un tanki di combustible den e baki di e pickup na Pomp #12. Esaki no ta prome biaha cu el a mira e pickup para na e pomp ey.
A bin haya sa cu e mainta ey a drenta denuncia cu un Pickup similar asina a horta mas di 2.213 Dollar na combustible for di un stacion di RaceTrac na Royal Palm Beach.
Polis a bin gara e homber y uno mas ta haciendo uso di e aparato scondi, y ambos a keda deteni, y por mira nan potret aki. Esun na man robez ta Evaristo Carballe Gonzalez di 48 aña, y esun na man drechi ta Yandry Escobar Fragoso di 39 aña. Cada uno tabatin un UHF remote control generico cu nan a cumpra via Amazon. Den e pomp a bin haya e aparato aki (potret) instala na un forma manipulativo y clandestino riba e circuit-board di e sensor.
