Mundo a drenta e etapa peligroso di acomoda su mes sin proteccion
*Alarma pa actitud di complacencia enfrente infeccion cu Covid-19
*E marcha peligroso pa morto den fila di Covid-19 ta wordo silencia
ORANJESTAD(AAN)—Alarma grandi ta wordo bati na nivel internacional y ta wordo reforza pa cifranan cu ta indica cu e peliger mas grandi di Covid-19 awor ta bati na porta, na momento cu hende kier ignora e peligronan grandi cu Covid-`19 ta representa pa su salud.
Proteccion contra Covid-19 cu tabata e arma mas poderoso cu hende tabata tin contra e enfermedad invisibel, awe a desaparece practicamente mientras hende ta acomoda su mes den e pensamento peligroso cu Covid-19 ta asunto di pasado.
Complacencia di hende enfrente e peliger grandi cu Covid-19 ta representa pa salud, ta habri caminda pa un situacion sumamente serio, den cual hende ta sigui infecta otro sin pordon of misericordia, poniendo asina bida di otro na peligro.
“Covid-19 ta keda un peligro directo pa bida di hende,”organisacionnan mundial di salud ta sigui trece dilanti hunto cu autoridad na diferente pais na mundo, caminda e cantidad di casonan di Covid-19 cu ta wordo registra, ta sigui subi na nivel internacional, cu un handicap sumamente grandi.
E problema grandi cu prevencion di Covid-19 ta confronta, ta e hecho cu hende aparentemente a acomoda su mes den presencia di Covid-19, sin realiza cu ainda e ta hunga cu su salud y cu su bida pasobra Covid-19 ta sigui mata sin piedad.
“E enemigo invisibel a bira un enemigo acepta pa hende cu ta entrega nan mes na peliger di Covid-19,”ta loke expertonan a trece dilanti localmente pero tambe na nivel internacional.
E actitud general contra Covid-19 ta, cu e no ta causa problema mas pa hende, cu ta bon na haltura di e supuesto “griep”cu ta ataca un grupo creciente di persona rond mundo, cu ta trata di ignora un realidad grandi y peligroso.
E sintomanan di presencia di Covid-19 por a bira menos, compara cu e prome atake di Covid-19 cu tabata mas desastroso cu un guera mundial pa bida humano sin proteccion.
Sinembargo awe, salud di hende ta sigui wordo afecta den un cantidad creciente di caso cu ta wordo silencia pa asina hende evita pa tuma medida pa scapa su mes bida y di otronan.
Hopi hende a wordo infecta ya hopi biaha dor di Covid-19 y hende ta pensa cu nada lo pasa. Sinembargo, cualkier infeccion di Covid-19 por resulta directamente den problema mortal y acumulativo, pues cu ta aumenta e peligro di problema serio di salud cerca hende.
Cientificonan ta splica cu cada bez cu un persona, sigur un persona cu ya tin un tendencia pa un enfermedad cu e mes no conoce of conoce, wordo afecta dor di Covid-19 e peligro pa su salud ta aumenta.
Como ehempel den cierto casonan ta uza e enfermedad di diabetis, cu ta na riesgo serio debi na e forma cu infeccion di Covid-19 ta afecta pancreas di un hende.
Sea cu hende ta acepta cu e tin Covid-19 y ta yuda evita cu otro hende por bira victima pa su motibo, cada infeccion nobo di Covid-19 no ta solamente loke ta parce di ta un andanza normal, pero ta un atake directo riba bida di hende pasobra Covid-19 ta afecta sanger di hende y ta haci cu e fluho di sanger ta cambia.
Cada biaha cu un persona sobrebibi un atake di Covid-19, realmente Covid-19 a laga su rastro atras.
Awor kico hende mester haci den e caso aki? Mundialmente medidanan oficial contra Covid-19 a wordo elimina y personanan cu haci uzo di proteccion manera tapaboca of ta tuma medidanan di prevencion, ta wordo considera como miedoso mientras otronan cu ta pone bida di hende na peligro, si ta wordo celebra na fiestanan.
Durante cada encuentro publico e chens pa wordo infecta cu Covid-19 ta presente, informantenan ta splica.
E peligro mas grandi di Covid-19 ta keda personanan cu ta na haltura cu nan tin e enfermedad pero no ta avisa otronan cu ta bini directamente den nan cercania y asina ta pone bida di otro hende na peligro.
Ta papia aki di un abuso pero tambe e realidad, cu un persona cu tin e enfermedad, ya cu e prome sintomanan no ta busca pa haci un test y isola su mes di otro, pero ta bay trabau, ta bay fiesta y ta sigui plama e enfermedad cu ta afecta salud di hende y ta conduci na morto.
Informantenan di DIARIO a bati alarma grandi pasobra e realidad di e resultadonan permanente di Covid-19 no ta haya atencion y Covid-19 di enemigo invisbel a bira awor enemigo acepta den bida di hopi hende cu ta pone henter comunidad na peliger mientras e marcha pa morto den fila di Covid-19 ta continua!
