ORANJESTAD (AAN) – Na DIARIO a drenta reaccion di un consumidor, un persona di edad grandi, cu a comenta cu den su desayuno banda di su coffie y un fruta, e tin cu haya su pan cu worst.
E ta gusta net esun di slice mas grandi y su color ta cora cla cu su “ronchinan” di vet meymey di dje, y ta locual e ta custumbra di cumpra tur ora.
Diasabra el a bay e supermercado unda semper e ta cumpra nan regularmente, y pa su sorpresa un paki cu 12 slice di worst su prijs a subi pa 24 florin! E no por a kere y a bay puntra si ta un fout tin, pero no, esey ta e prijs nobo.
E mester a cumpra di esun otro cu su color ta mas scur y di slides mas chikito, cu mas tanto hende ta uza pa traha omelet cune, y no pa sandwich.
E meneer a comenta cu ora el a mira cu tin strawberries, cu ta e fruta faborito di su nieto chikito, el a pensa cu e ta hiba un caha chikito pe. Den e mesun supermercado Diahuebs su yiu a cumpra un cahita pa e mucha pa 13,50 florin, cu riba su mes ta caro, pero ya pa Diasabra (kiermen dos dia despues) e mesun fruta aki a bira 17.80.
E consumidor ta haya cu ta mucho di mas! Y como semper ta wordo uza e argumento cu esakinan no ta producto proteha den e macuto basico (cu no tur supermercado ta bende na mesun prijs tampoco), y cu Aruba tin mercado liber, ta imposible pa puntra pa control di prijs en general. Esey no ta existi akinan.
E persona aki ta corda cu un par di luna pasa cu tambe den un supermercado a pone e prijs di strawberries bay hopi halto, nan a keda sin bende e producto y ya pa e final di siman por a mira un trahador piki tur hinca nan den un saco pa benta nan afo. E ta punta su mes, si esey ta haci negoshi?
Si nan lo a baha prijs (e ora ey tabata 15 florin pa caha) sikiera na 12 florin, nan lo no a haya e perdida aki. Y ban wak si tin consumidor cu awo ta bay paga 17 y pico florin pa un caha di strawberries, of aki algun dia, atrobe hopi caha ta wordo benta afo.
Prijsnan ta wordo aumenta sin piedad, pa un comunidad cu a bira di poco recurso, den su gran mayoria, y unda hopi cabes di famia no a sali afo ainda, di nan condicion di desemplea.
