ORANJESTAD (AAN) — Un consumidor a mustra cu disgusto ya cu e anochi anterior el a cumpra un saco di batata den un supermercado, y su mainta siguiente el a habri e saco pa uza algun batata pa traha su cuminda di merdia.
Pa su sorpresa mas cu mitad di e saco di batata tabata putri, locual por mira riba potret. El a yama na e supermercado pa reclama y a hiba despues e batatanan putri den e saco original.
E ta gradici si cu el a haya e cent bek, pero e dilema ta cu mientras costo di bida ta subi, y esey tur caminda na Aruba, e calidad di productonan cu ta wordo importa, ta baha!
E consumidor ta haya cu den tur supermercado mester pone un hende pa revisa e productonan, tanto berdura como fruta, como esnan den reki pasobra sa sosode cu pa descuido, nan ta laga un of otro producto ya caduca riba reki.
Tocante fruta y berdura (por ehemplo batata) tin saconan unda por mira e producto di biaha, y e consumidor mes por wak si tur ta bon of tin cu no ta bon. Pero tin saconan traha cu buraco chikito cu no ta permiti observa con e producto ta.
Den e caso aki di e batatanan putri, den e supermercado a pidie despensa y a haci lo corecto, pero e ta pensa cu ta bon pa trece dilanti den DIARIO cu e obhetivo di concientiza e doñonan di supermercado cu mester ta check nan productonan, y tambe si ta posible papia cu e distribuidor, ya cu hopi producto cu ta drentando Aruba ta di mal calidad y plus, caro! “Si bo tin cu paga un prijs halto pa cualkier producto, como consumidor bo tin derecho di haya bon calidad cu por bisa cu toch, ta bal e prijs. Paga pa mal calidad y mas den un situacion di crisis cu nos tur ta pasando den dje, simplemente no ta husto!” e consumidor a bisa.
