Minister Geoffrey Wever:
ORANJESTAD (AAN) – Durante e conferencia di prensa na Post Aruba NV, Diamars mainta, tambe a hiba palabra Minister Geoffrey Wever, Titular di Economia, Comunicacion y Desaroyo Sostenible. E conferencia di prensa aki ta en conexion cu e logro grandi di e compania di adkiri un flota nobo di auto electrico.
Minister Geoffrey Wever a expresa cu pa su persona y pa Gobierno esaki ta un bunita momento, pa mira un empresa estatal cu ta parti di e patrimonio di pais Aruba, alinia hunto cu e vision di gobierno, pa inverti den sostenibilidad y percura pa acelera, hunto cu Gobierno, e transicion di energia, contribuyendo na un medio ambiente mas limpi y den e mesun rosea, percura pa reduci e gastonan operacional di e empresanan estatal, pero tambe tin un efecto positivo riba e emision di CO2.
“Mi ta contento di wak e Gerencia di Post Aruba NV, cu señora Esther Gomes como directora nobo di Post, y tambe con e Operations Manager Ramoncito Croes, ta contribui na e vision aki, y awo nos ta akinan pa wak Post Aruba NV cu su cinco (di ocho) auto electrico nobo, e prome inversion den innovacion y sostenibilidad”, Minister Geoffrey Wever a señala.
E dignatario ta spera cu esaki ta un señal tambe pa sector priva, pa wak cu Gobierno y su entidadnan estatal ta kere den sostenibilidad, transicion di energia, y tambe den reduci e gastonan operacional tanto di su mes como di su empresanan estatal.
