Minister Geoffrey Wever
ORANJESTAD (AAN): Pa di prome biaha den diescuater aña, Aruba ta importa carne, cabrito y porco nobo pa diversifica e seleccion di bestia pa e programa di cria di bestia di Dienst Landbouw, Veeteelt en Visserij (DLVV) na Santa Rosa. Den colaboracion cu Comision Pro Cunucero Arubiano (CPCA), Minister Geoffrey Wever, encarga cu Sector Primario, a tuma e iniciativa pa trece 64 bestia di cria di rasa puro Aruba, y lo pone 18 carne y cabrito disponibel na prijs di cumpra pa criadornan local. Ta spera cu e bestianan yega Aruba den e di dos siman di september.
Den preparacion pa e yegada di e bestianan nobo, Santa Rosa a pone varios di nan bestianan actual na benta, esaki a inclui varios cabrito, carne y porco pa criador local.
Pa basta tempo caba, sector local di cria di bestia tin necesidad di bestia nobo. Pa motibo di e entrada limita di carne, cabrito y porco nobo pa cria, diversidad genetico den e poblacion di bestia a baha. Esaki ta aumenta, entre otro, e riesgo di cruza entre bestia cu ta famia y por tin consecuencia pa productividad, fertilidad y salud di e bestianan. Tambe, despues di diescuater aña, e programa di cria di DLVV tin necesidad di un impulso di carne, cabrito y porco nobo.
Ariba 8 di December, 2025, Minister Wever a firma un MOU cu un stakeholder importante den Sector Primario, Comision Pro Cunukeronan Arubiano (CPCA),cu e indica e gravedad di un problema andando den nos Sector Primario pa cu e genetica di e bestianan di cria na Aruba y problema pa rasa. Y Diadomingo, September 13, menos cu un aña despues, a haci un stap importante realidad, cu e yegada di 64 bestia nobo pa sector di cria na Aruba.
Cu e importacion nobo aki, ta trece un cambio concreto den esaki. E pedido ta consisti di 28 cabrito, 21 carne y 18 porco:
- 18 cabrito Boer: 5 macho y 13 hembra;
- 10 cabrito Nubian: 3 macho y 7 hembra;
- 14 carne Dorper: 4 macho y 10 hembra;
- 7 carne White Dorper: 3 macho y 4 hembra;
- 18 porco di raza puro: 8 macho y 10 hembra di e razanan Landras, Yorkshire y Duroc.
E bestianan nobo ta duna DLVV e oportunidad pa bolbe construi su programa di cria cu un base mas amplio y di mihor calidad. Despues, e descendientenan por contribui na un mehoracion continuo di e poblacion local di bestia.
“Despues di diescuater aña, ta importante pa nos inverti den e base y diversifica nos cria di bestia. Nos no kier solamente fortifica e programa di cria di DLVV, pero tambe percura pa e inversion aki finalmente beneficia nos criadornan local y e desaroyo continuo di Sector Primario, cual ta un sector di hopi importancia pa Aruba. Un cria di bestia local mas fuerte ta contribui tambe na nos ambicion pa produci mas localmente y fortifica nos seguridad alimentario,” segun Minister Geoffrey Wever.
Di e carnenan y cabritonan importa, 18 bestia lo wordo pone disponibel na prijs di cumpra pa criadornan local. E porconan importa lo keda na DLVV y lo wordo usa den su propio programa di cria.
Di e forma aki, criadornan local ta haya acceso directo na bestia nobo di rasa puro, sin cu nan mes mester organisa un proceso internacional di importacion cu ta complica y costoso.
Criadornan local cu ta registra cerca DLVV (Santa Rosa) ta bin na remarca pa esaki. DLVV lo coordina e condicionnan adicional y asignacion di e bestianan disponibel.
E renobacion di cria di bestia ta bay mas leu cu solamente importacion di genetica nobo. E stalnan existente di DLVV na Santa Rosa lo ricibi un renovacion profundo. Den esaki lo wak, entre otro, reparacionnan necesario y mehoracionnan riba tereno di acomodacion, higiene, bioseguridad y cuido practico di e bestianan.
Ademas, actualmente, den colaboracion cu Wageningen Universiteit, ta investiga e posibilidadnan pa diseño y construccion di un stal nobo y prepara pa futuro pa DLVV.
E combinacion di carne, cabrito y porco nobo, mihor alohamento y fortalecemento di e programa di cria mester percura pa DLVV por bolbe cumpli un rol mas fuerte den desaroyo di cria di bestia local.
“P’esey, esaki ta mas cu solamente cumpra di algun bestia. Nos ta inverti den e base cu ta necesario pa sigui desaroya cria di bestia na Aruba di forma structural. DLVV mester por sostene criadornan local cu material di cria di calidad, conocemento y bon facilidadnan, pa asina hunto nos por construi un sector mas profesional y prepara pa futuro,” segun Minister Geoffrey Wever.
Cu e programa di renobacion genetico, Gobierno, hunto cu DLVV, CPCA y criadornan local, kier traha pa un poblacion di bestia mas saludabel y productivo. E inversion aki ta contribui na menos cruza entre bestia cu ta famia, mihor calidad di bestia, mihor salud di bestia y un fortalecemento structural di cria local.
{gallery}Compra di carne, cabrito y porco nobo ta diversifica e seleccion di cria di bestia di Sector Primario{/gallery}
